সুদীর্ঘ বিচ বছীয়া ধাৰা অব্যাহত ৰাখি ১ নৱেম্বৰৰ পৰা ১২ নৱেম্বৰলৈ চান্দমাৰিৰ অসম অভিযান্ত্ৰিক প্ৰতিষ্ঠান খেলপথাৰত অনুষ্ঠিত হ’ব ২১ সংখ্যক উত্তৰ-পূব গ্ৰন্থমেলা।
আজি গুৱাহাটী প্ৰেছ ক্লাৱত এখন সংবাদমেল সম্বোধন কৰি সদৌ অসম পুথি প্ৰকাশক আৰু বিক্ৰেতা সন্থাৰ সাধাৰণ সম্পাদক ধীৰাজ গোস্বামীয়ে ২১ সংখ্যক উত্তৰ-পূব গ্ৰন্থমেলাখন বিশিষ্ট শিক্ষাবিদ টাবুৰাম টাইডৰ স্মৃতিত অনুষ্ঠিত কৰা হ’ব বুলি জানিবলৈ দিয়ে।
আনহাতে, বিশিষ্ট সমাজকৰ্মী জি এল আগৰৱালা আৰু বিশিষ্ট চিত্ৰ শিল্পী বেণু মিশ্ৰৰ সোঁৱৰণত গ্ৰন্থমেলাখনৰ মূল মঞ্চখন উৎসৰ্গা কৰা হ’ব বুলি সংবাদমেলত জনাই গোস্বামীয়ে।
বিগত বৰ্ষবোৰৰ দৰে ২১ সংখ্যক উত্তৰ-পূব গ্ৰন্থমেলাতো আলোচনা চক্ৰ, অন্তৰংগ আলাপকে ধৰি বিভিন্ন সাহিত্যৰ অনুষ্ঠান অনুষ্ঠিত হ’ব।
এইবাৰৰ গ্ৰন্থমেলাতো ছাত্ৰ-ছাত্ৰীসকলৰ বাবে প্ৰৱেশ বিনামূলীয়া হ’ব বুলি সংবাদ মেলত গোস্বামীয়ে কয়।
তদুপৰি, গ্ৰন্থমেলাৰ বাবে গ্ৰন্থৰ বিপণিসমূহ বুক কৰাৰ অন্তিম তাৰিখ ১৫ অক্টোবৰ। ২৩ অক্টোবৰত বিপণিসমূহৰ স্থান আৱণ্টনৰ বাবে আয়োজক সমিতিয়ে লটাৰী অনুষ্ঠিত কৰিব বুলি গোস্বামীয়ে মন্তব্য কৰে।
উল্লেখযোগ্য যে, গ্ৰন্থপ্ৰেমীসকলক উৎসাহিত কৰাৰ বাবে ২১ সংখ্যক গ্ৰন্থমেলাত আয়োজক সমিতিয়ে বিশেষ পুৰস্কাৰ আৰু সম্বৰ্ধনাৰ ব্যৱস্থা কৰিছে।
সেইমৰ্মে, ১০,০০০ টকাৰ অধিক মূল্যৰ গ্ৰন্থ ক্ৰয় কৰা ব্যক্তিক সম্বৰ্ধনা জনোৱা হ’ব বুলি সংবাদ মেলত জনায় গোস্বামীয়ে।
সংবাদমেলত সদৌ অসম পুথি প্ৰকাশক আৰু বিক্ৰেতা সন্থাৰ সম্পাদক ধীৰাজ গোস্বমীৰ উপৰি সভপতি ইমৰান আহমেদ উপস্থিত থাকে।
