পুনৰ সলনি হ’ব পাৰে মহাৰাষ্ট্ৰৰ ৰাজনৈতিক গতি-বিধি! বছৰদিয়েক নহওঁতেই যৱনিকা পৰাৰ দিশে অগ্ৰসৰ হৈছে মহাৰাষ্ট্ৰৰ শাসকীয় শিৱসেনাৰ একনাথ সিন্দে গোট আৰু বিজেপিৰ মধুচন্দ্ৰিকা! শিৱসেনাত বিসম্বাদ তথা বিভাজনেৰে একনাথ সিন্দেৰ নেতৃত্বত বিজেপিৰ সংগ লোৱা বহুকেইগৰাকী নেতাৰ মোহভংগ ঘটিছে বিজেপিৰ প্ৰতি!
এই দাবী কৰা হৈছে শিৱসেনাৰ উদ্বৱ থাকৰে গোটৰ মুখপাত্ৰ সামনাত। এই দাবী অনুসৰি মুখ্যমন্ত্ৰী একনাথ সিন্দেৰ নেতৃত্বত থকা শিৱসেনাৰ গোটটোৰ ২২ গৰাকী বিধায়ক আৰু ৯ গৰাকী লোকসভাৰ সাংসদ ভাৰতীয় জনতা পাৰ্টিৰ ওপৰত অসন্তুষ্ট হৈ সিন্দে শিবিৰ এৰিব বিচাৰিছে।
শিৱসেনাৰ থাকৰে গোটৰ নেতা তথা সাংসদ বিনায়ক ৰাউতৰ ভাষ্য মতে, সিন্দে গোটৰ উক্ত বিধায়ক তথা সাংসদসকলে মূল দলৰ সৈতে যোগাযোগ কৰি আছে আৰু তেওঁলোকৰ সমষ্টিত কোনো উন্নয়ন হোৱা নাই বাবে সিন্দে নেতৃত্বাধীন গোটটো এৰিব বিচাৰিছে।
‘হম হি শিৱসেনা’ শ্লোগানেৰে সিন্দে গোটৰ অন্যতম প্ৰধান নেতা হিচাপে পৰিচিত হৈ পৰা দলৰ জ্যেষ্ঠ নেতা গজানন কীৰ্তিকাৰে বিজেপিৰ আচৰণক লৈ মুকলিকৈ অসন্তুষ্টি প্ৰকাশ কৰিছে বুলি সামনাই লগতে দাবী কৰিছে।
ৰাজ্যখনৰ শাসকীয় বিজেপি-শিৱসেনাৰ মিত্ৰতাত একোৱেই ঠিক নহয় বুলি ইংগিত দি কীৰ্তিকাৰে বিজেপিৰ বিৰুদ্ধে বৈষম্যৰ অভিযোগ উত্থাপন কৰে। তেওঁ কয়, ‘আমি ১৩ গৰাকী সাংসদ আৰু আমি এতিয়া এন ডি এৰ অংশ হৈছো।”
এই সাংসদসকলে প্ৰতিনিধিত্ব কৰা সমষ্টিসমূহৰ সৈতে জড়িত সমস্যাসমূহ অগ্ৰাধিকাৰ ভিত্তিত সমাধান হ’ব বুলি আশা কৰিছিল যদিও সম্প্ৰতি তেনেকুৱা হোৱা দেখা নাই বুলি ক্ষোভ প্ৰকাশ কৰিছে গজানন কীৰ্তিকাৰে।
কীৰ্তিকাৰৰ এই মন্তব্যৰ উদ্ধৃতি দি সামনাই কয় যে, আত্মসন্মান আৰু সন্মান টকাৰে কিনিব নোৱাৰি, সেয়া আকৌ এবাৰ প্ৰমাণিত হৈছে। কীৰ্তিকাৰে দাবী কৰে যে তেওঁৰ দলে ৰাজ্যৰ ২২খন লোকসভা আসনত প্ৰতিদ্বন্দ্বিতা কৰিব বিচাৰিব।
“ইয়াৰ অৰ্থ হ’ল তেওঁলোকে বিজেপিৰ পৰা আসন বিচাৰিছে। অৱশ্যে এই গোটক পাঁচ-সাতখন আসন দিবলৈও বিজেপি সাজু হোৱা নাই।”- সামনাই লগতে প্ৰতিবেদনত এইদৰে প্ৰকাশ কৰিছে।
যদি সামনাত প্ৰকাশিত এই প্ৰতিবেদন প্ৰকৃততেই সত্য হয়, তেতিয়া অনাগত সময়ছোৱাত মহাৰাষ্ট্ৰৰ ৰাজনৈতিক দৃশ্যপট সলনি হোৱাৰ আশংকা স্বাভাৱিকতেই নুই কৰিব নোৱাৰি।
