ভয়ংকৰ দুৰ্যোগৰ ৬ দিন পাৰ হ’লেও চৌপাশৰ ত্ৰাস এতিয়াও শেষ হোৱা নাই। নেপালৰ বান কবলিত নুৱাকোটৰ এটা ঘৰৰ পৰা উদ্ধাৰ হৈছে কমেও ২৩টাকৈ মৃতদেহ।
মঙলবাৰে পুৱালৈকে পোৱা খবৰ অনুসৰি যোৱা সপ্তাহৰ ভয়ংকৰ আকস্মিক বানত মৃত্যু হোৱা লোকৰ সংখ্যা ৯৬২ জনলৈ বৃদ্ধি পাইছে। এতিয়াও প্ৰায় ৪ হাজাৰ লোক সন্ধানহীন হৈ আছে।
২৬ আগষ্টত নেপাল-তিব্বত সীমান্তৰ সমীপৰ এটা হিমবাহৰ অংশ ভাঙি প্ৰলংয়কাৰী বান আহে। সেই দুৰ্যোগত মৃত্যুৰ সংখ্যা এতিয়াও বৃদ্ধি পাই আছে। ভয়ংকৰ বানত বুৰ গৈছে বিশাল অঞ্চল।
উত্তৰ আৰু মধ্য নেপালৰ বহু চহৰ আৰু গাঁও ব্যাপকভাৱে ক্ষতিগ্ৰস্ত হৈছে। ভোটকোশী-ত্ৰিশুলি নদীৰ ওপৰেৰে বাগৰি অহা প্ৰবল পানীৰ সোঁতে বহু ঘৰ-দুৱাৰ, যান-বাহন, ৰাস্তা-ঘাট, দলং উটুৱাই লৈ গৈছে। কেইবাটাও জলবিদ্যুৎ প্ৰকল্পৰো ক্ষতিসাধন হৈছে।
নুৱাকোটৰ এটা ঘৰৰ পৰা ২৩টা মৃতদেহ উদ্ধাৰ হোৱাৰ ঘটনাই বানৰ ভয়াবহতাৰ কথা সোঁৱৰাই দিছে। ইপিনে, ৰাষ্ট্ৰসংঘই সতৰ্ক কৰি দিছে যে বান বিধ্বস্ত অঞ্চলৰ ৬৫ হাজাৰ লোকক জৰুৰী ভিত্তিত পানী, অনাময় আৰু পৰিষ্কাৰ-পৰিচ্ছন্নতাৰ সাহায্যৰ প্ৰয়োজন।
অধিকাংশ মৃতদেহ নদীৰ বহু তলত উদ্ধাৰ হৈছে। যাৰ ফলত কৰ্তৃপক্ষৰ বাবে চিনাক্ত কৰাটো কঠিন হৈ পৰিছে। পৰিয়ালসমূহে চিকিৎসালয় আৰু মৃতদেহৰ ফটোৰ মাজেৰে সন্ধানহীন হোৱা আত্মীয়ক বিচাৰিছে। ক্ষতিগ্ৰস্ত বাট-পথ আৰু পুনৰ বৰষুণৰ আশংকাই সাহায্য আৰু উদ্ধাৰ অভিযান অধিক কঠিন কৰি তুলিছে।
