আৰ জি কৰ ধৰ্ষণ কাণ্ডৰ বিৰুদ্ধে অব্যাহত আছে কনিষ্ঠ চিকিৎসকৰ প্ৰতিবাদী কাৰ্যসূচী । উচ্চতম ন্যায়ালয়ে বাৰে বাৰে অনুৰোধ কৰাৰ পিছতো প্ৰতিবাদ কৰিবলৈ এৰা নাই চিকিৎসক সকলে।
সোমবাৰৰ পৰা উচ্চতম ন্যায়ালয়ত আৰ জি কৰ গোচৰৰ শুনানি আৰম্ভ হোৱাৰ লগে লগে ৰাজ্য চৰকাৰৰ অধিবক্তা কপিল ছিবালে এই সন্দৰ্ভত উচ্চতম ন্যায়ালয়ৰ দৃষ্টি আকৰ্ষণ কৰে।
ছিবালে কয় যে এই পৰ্যন্ত চিকিৎসাৰ অভাৱত ২৩ জন লোকৰ মৃত্যু হৈছে। কাৰণ চৰকাৰী চিকিৎসালয়ত চিকিৎসকে কাম কৰা নাই। কপিল ছিবালে লগতে কয় যে ৰাজ্য চৰকাৰে উচ্চতম ন্যায়ালয়ত ষ্টেটাছ ৰিপৰ্টও দাখিল কৰিছে।
আজি আদালতত ছিবালে কয় যে, “এই কেইটামান দিনত চিকিৎসকৰ ধৰ্মঘটৰ ফলত ২৩ জন লোকৰ মৃত্যু হোৱাই নহয়, চিকিৎসা নাপাই ৬ লাখ লোক হাৰাশাস্তিৰ সন্মুখীন হৈছে। চৰকাৰী চিকিৎসালয়ৰ চিকিৎসাৰ ওপৰত বহু লোক নিৰ্ভৰশীল। বিশেষকৈ কাৰ্ডিঅ’লজী বা অংক’লজীৰ দৰে বিভাগত চিকিৎসাৰ প্ৰয়োজন হোৱাসকলে ব্যক্তিগত চিকিৎসালয়ৰ খৰচ বহন কৰিব নোৱাৰে।
লগতে কপিল ছিবালে কয়, “ৰোগীক এনেদৰে মৰিবলৈ দিব নোৱাৰি। ইতিমধ্যে উচ্চতম ন্যায়ালয়ে কামলৈ ঘূৰি আহিবলৈ কৈছিল যদিও চিকিৎসকে সেই কথা নুশুনিলে। কেৱল সেয়াই নহয়, উচ্চতম ন্যায়ালয়ে কোৱা শান্তিপূৰ্ণ প্ৰতিবাদৰ কথাও আন্দোলনকাৰীসকলে নুশুনিলে। যোৱা কেইদিনত প্ৰতিবাদত ৪১ জন আৰক্ষী জোৱান আহত হৈছিল, আনকি এজন আৰক্ষীয়ে দৃষ্টিশক্তিও হেৰুৱাইছে।
উল্লেখ্য যে আৰ জি কৰ গোচৰৰ শেষ শুনানিত উচ্চতম ন্যায়ালয়ে বাৰে বাৰে চিকিৎসকসকলক ধৰ্মঘট বাতিল কৰিবলৈ অনুৰোধ জনাইছিল। কেৱল কলকাতা নহয়, দিল্লীৰ এইমছ পি জি আই চণ্ডীগড়তো কনিষ্ঠ চিকিৎসক সকলে ধৰ্মঘট কৰি আছে।
স্মৰ্তব্য যে আৰ জি কৰ হাস্পতালে এতিয়াও ধৰ্মঘট কৰা নাই। কনিষ্ঠ চিকিৎসকে অৱশ্যে দাবী কৰে যে তেওঁলোকে শিবিৰ পাতি ৰোগীক দেখা কৰি আছে। কিন্তু ইয়াৰ মাজতে আৰ জি কাৰ হাস্পতালত এজন যুৱকৰ মৃত্যুক লৈ পুনৰ বিতৰ্কৰ সৃষ্টি হৈছে।
কিছুদিন পূৰ্বে আৰ জি কাৰ হাস্পতালত মৃত্যু হৈছিল এজন ২৮ বছৰীয়া যুৱকৰ। চিকিৎসা অবিহনে তেওঁৰ মৃত্যু হোৱাৰ অভিযোগ কৰিছে পৰিয়ালৰ লোকে।
মৃত যুৱকজনৰ মাতৃয়ে কয়, “দুৰ্ঘটনা হোৱাৰ পিছত যিমান পাৰি সোনকালে চিকিৎসালয়লৈ লৈ আহিলোঁ। কিন্তু ডাক্তৰ নাই, চিকিৎসা নাই। একেৰাহে ৩ ঘণ্টা ধৰি চিকিৎসা অবিহনে মৃত্যু হয় ল’ৰাজনৰ।”
