ৰাজ্যৰ কেইবাখনো জিলাত এতিয়া চলিছে ভদীয়া বানৰ তাণ্ডৱ। বানৰ কৱলৰ পৰা এইবাৰো মুক্ত হ’ব পৰা নাই এশিঙীয়া গঁড়ৰ বাবে বিখ্যাত কাজিৰঙা ৰাষ্ট্ৰীয় উদ্যান।
শেহতীয়া বানত কাজিৰঙা ৰাষ্ট্ৰীয় উদ্যানত এতিয়ালৈকে ২৪ টা বন্যপ্ৰাণীৰ মৃত্যু ঘটাৰ তথ্য পোৱা গৈছে।
মৃত্যু ঘটা বন্যপ্ৰাণী কেইটাৰ ভিতৰত আছে ১৭ টা খটীয়া পহু, দুটা গঁড়,এটা বনৰীয়া ম’হ,দুটা দল হৰিণা, এডাল অজগৰ আৰু এটা টুপীমূৰীয়া বান্দৰ।
বন বিভাগৰ কৰ্মীয়ে এতিয়ালৈকে ৰাষ্ট্ৰীয় উদ্যান খনৰ বানাক্ৰান্ত অঞ্চলৰ পৰা চাৰিটা বন্যপ্ৰাণী উদ্ধাৰ কৰিবলৈ সক্ষম হৈছে।
উদ্ধোৰ কৰা বন্যপ্ৰাণী কেইটাৰ ভিতৰত এটি ১০ দিনীয়া গঁড়ৰ পোৱালিও আছে।
বানৰ পৰা প্ৰাণৰক্ষাৰ তাড়নাত জন্তুবোৰ যেনিয়ে তেনিয়ে ঢাপলি মেলিছে।
বিগত বৰ্ষত বানত উদ্যানখনৰ বাগৰি বনাঞ্চলত এটা প্ৰাপ্তবয়স্ক মতা গঁড়, কহঁৰা বনাঞ্চলৰ হালধিবাৰী বন শিবিৰ এলেকাত এটা পোৱালি গঁড় আৰু অগৰাতলি বনাঞ্চলত এটা গঁড়ৰ মৃত্যু হৈছিল।