ক’ৰ’না ভাইৰাছৰ দ্ৰুত সংক্ৰমণৰ মাজতে অসমৰ ৩৩ খন জিলাৰ ২৫ জিলাই বানৰ কৱলত পৰা বিষয়টোৱে ৰাজ্য চৰকাৰৰ লগতে জনসাধাৰণক উদ্বিগ্ন কৰি তুলিছে।
২৫ খন জিলাৰ বিভিন্ন অঞ্চল পানীয়ে বুৰাই পেলোৱাৰ লগতে সোমবাৰলৈকে বানৰ ফলত ২২ গৰাকী লোকৰ মৃ্ত্যু হোৱাৰ তথ্য লাভ কৰা হৈছে।
এই তথ্য প্ৰদান কৰিছে অসম ৰাজ্যিক দুৰ্যোগ ব্যৱস্থাপনা প্ৰাধিকৰণে।
প্ৰাধিকৰণে জনোৱা অনুসৰি ডিব্ৰুগড়ত দুজন আৰু বৰপেটা, গোৱালপাৰাত একোজনকৈ লোকে প্ৰাণ হেৰুৱাইছে।
বানৰ কৱলত পৰা জিলা কেইখন হৈছে- ধেমাজি, লখিমপুৰ, ওদালগুৰি, চিৰাং, দৰং, নলবাৰী, বৰপেটা, বঙাইগাঁও, কোকৰাঝাৰ, ধুবুৰী, দক্ষিণ শালমাৰা, গোৱালপাৰা, কামৰূপ, মৰিগাঁও, হোজাই, নগাঁও, যোৰহাট আদি।
ইয়াৰ উপৰি গোলাঘাট, শিৱসাগৰ, মাজুলী, ডিব্ৰুগড়, তিনিচুকীয়া আৰু পশ্চিম কাৰ্বি আংলং জিলাও বানৰ কৱলত পৰিছে।
উল্লেখ্য যে, এই বানত সৰ্বাধিক ক্ষতিগ্ৰস্ত হোৱা জিলাখন হৈছে বৰপেটা। জিলাখনত প্ৰায় তিনিলাখৰো অধিক লোক বানৰ কৱলত পৰিছে।
ইয়াৰ উপৰি দক্ষিণ শালমাৰাত ১.৯৫ লাখ, নলবাৰীৰ ১.১৭ লাখ আৰু মৰিগাঁও আৰু ধেমাজিৰ প্ৰায় ১-১ লাখ লোক বানৰ কৱলত পৰা বুলি প্ৰাধিকৰণে জনায়।
চৰকাৰী তথ্য অনুসৰি এই পৰ্যন্ত ২০৭১ খন গাঁও আৰু ৬৮ হাজাৰ হেক্টৰ কৃষি ভুমি পানীৰ কৱললত পৰিছে।
জানিব পৰা মতে এতিয়াও ব্ৰহ্মপুত্ৰৰ লগতে ইয়াৰ উপনৈ সমূহৰ জলপৃষ্ঠ বিপদসীমাৰ ওপৰেৰ বৈ আছে।
