ক’ৰ’না ভাইৰাছত আক্ৰান্ত হৈ উত্তৰ প্ৰদেশত প্ৰথম গৰাকী লোকৰ মৃত্যু হৈছে।
গৌৰখপুৰৰ বিআৰডি চিকিৎসালয়ত মঙলবাৰে নিশা এজন ২৫ বছৰীয়া যুৱকে ক’ৰ’নাৰ আগত হাৰ মানে।
উত্তৰ প্ৰদেশৰ গৌৰখপুৰৰ এটা বস্তি অঞ্চলত যুৱকজনে বাস কৰিছিল বুলি জানিব পৰা গৈছে।
বস্তিৰ চিকিৎসক গৰাকীয়ে যুৱকজন ক’ৰ’নাত আক্ৰান্ত হোৱা বুলি পূৰ্বে উল্লেখ কৰিছিল।
ক’ৰ’না ভাইৰাছৰ সংক্ৰমণৰ ফলত প্ৰাণ হেৰুওৱা উত্তৰ প্ৰদেশৰ যুৱকজন দেশৰ আটাইতকৈ কনিষ্ঠ ব্যক্তি।
ইয়াৰ পূৰ্বে মধ্য প্ৰদেশৰ এগৰাকী ৩৫ বছৰৰ আৰু বিহাৰৰ ৩৮ বছৰৰ ব্যক্তিয়ে ক’ৰ’নাত আক্ৰান্ত হৈ মৃত্যু হৈছিল।
উত্তৰ প্ৰদেশৰ ২৫ বছৰীয়া যুৱকজন ক’ৰ’নাত আক্ৰান্ত হৈ মৃত্যু হোৱাৰ পাছত ভাৰতৰ কিছু মানুহৰ মনত কম বয়সৰ লোক সহজে ক’ৰ’নাত আক্ৰান্ত নহয় বুলি চলি থকা ভ্ৰান্ত ধাৰণাত যতি পৰিল।
উল্লেখযোগ্য যে, ভাৰতত ক’ৰ’নাত আক্ৰান্ত হোৱা লোকৰ সংখ্যা ক্ৰমাৎ বৃদ্ধি পাইছে।
ভাৰতৰ ভিতৰত মহাৰাষ্ট্ৰত সৰ্বাধিক লোক ক’ৰ’নাত আক্ৰান্ত হোৱাৰ বিপৰীতে দ্বিতীয় স্থানত আছে কেৰালা।
