এক লোহহৰ্ষক ঘটনা। ঘটনাটো সংঘটিত হৈছে মধ্য প্ৰদেশৰ ৰতলাম জিলাত জাৱৰাত।
ঘটনা বিৱৰণীৰ মতে দেওবাৰে পুৱা ভাগত এগৰাকী ২৫ বছৰীয়া যুৱতীয়ে এখন বিউটী পাৰ্লাৰলৈ গৈছিল।
দেওবাৰে সন্ধিয়া বেলাত আছিল যুৱতীগৰাকীৰ বিয়া।
বিউটী পাৰ্লাৰত থকা অৱস্থাত এজন ব্যক্তিয়ে পাৰ্লাৰত সোমাই ছুৰিৰে হানি-খুচি হত্যা কৰে ২৫ বছৰীয়া যুৱতীগৰাকীক।
“যুৱতী গৰাকী আৰু তাই ভগ্নীয়ে বিউটী পাৰ্লাৰলৈ গৈছিল। তাতে হঠাৎ এজন ব্যক্তি সোমাই ছুৰিৰে যুৱতীগৰাকীক আঘাত সানি তাৰ পৰা পলায়ন কৰে। যুৱতী গৰাকীক চিকিৎসালয়লৈ নিয়াৰ পিছত চিকিৎসকে মৃত বুলি ঘোষণা কৰে।” স্থানীয় আৰক্ষী বিষয়া গৌৰৱ তিৱাৰীয়ে কয়।
ইতিমধ্যে ঘটনা সন্দৰ্ভত আৰক্ষীয়ে তদন্ত প্ৰক্ৰিয়া আৰম্ভ কৰিছে। তদন্তকাৰী দলে ঘটনাৰ সন্দৰ্ভত কিছু তথ্য লাভ কৰিছে বুলি দাবী কৰিছে আৰক্ষী বিষয়াগৰাকীয়ে।
আৰক্ষী বিষয়া গৌৰৱ তিৱাৰীয়ে কয়, “অভিযুক্তৰ সম্পৰ্কে আমি কিছু তথ্য লাভ কৰিছো। অতি শীঘ্ৰে এই হত্যাকাণ্ডৰ তদন্ত সমাপ্ত কৰিব পাৰিম বুলি আমাৰ বিশ্বাস।”
অভিযুক্তৰ সৈতে যুৱতী গৰাকীৰ কিবা সম্পৰ্ক আছিল নেকি সেই সন্দৰ্ভতো আৰক্ষীয়ে তদন্ত আৰম্ভ কৰিছে।
আৰক্ষীয়ে প্ৰকাশ কৰা অনুসৰি মৃত যুৱতী গৰাকী মধ্যপ্ৰদেশৰ চাজাৰপুৰৰ বাসিন্দা। দেওবাৰে যুৱতীগৰাকীৰ নাগদাৰ অঞ্চলৰ এগৰাকী ব্যক্তিৰ সৈতে বিবাহপাশত আৱদ্ধ হোৱাৰ কথা আছিল।