কাশ্মীৰী পণ্ডিতৰ ক্ষেত্ৰত বিজেপি চৰকাৰে চৰম দুতলীয়া আচৰণ কৰা দেখা গৈছে। যোৱা কেইবামাহো ধৰি নিৰৱচ্ছিন্নভাৱে চৰকাৰৰ বিৰুদ্ধে প্ৰতিবাদ সাব্যস্ত কৰি আহিছে জন্মু কাশ্মীৰৰ কাশ্মীৰী পণ্ডিতসকলে।
উল্লেখ্য যে বিবেক অগ্নিহোত্ৰীৰ প্ৰপাগাণ্ডামূলক ছবি দ্য কাশ্মীৰ ফাইলছকলৈ ভীষণ ব্যস্ত হৈ পৰিছিল কেন্দ্ৰৰ মোদী চৰকাৰৰ লগতে বিজেপি শাসিত ৰাজ্য চৰকাৰসমূহ। খোদ প্ৰধানমন্ত্ৰী নৰেন্দ্ৰ মোদীয়ে কেবিনেটত আহ্বান জনাইছিল যে ছবিখন সকলো দেশবাসী চোৱা উচিত।
প্ৰধানমন্ত্ৰী মোদীয়ে লগতে কৈছিল যে ছবিখনে কাশ্মীৰী পণ্ডিতসকলৰ ওপৰত চলি অহা অকথ্য নিৰ্যাতনক পোহৰলৈ আনি ছবিখনে ঐতিহাসিক দায়িত্ব পালন কৰিছে। ইপিনে বিজেপি শাসিত ৰাজ্যসমূহৰ চৰকাৰেও ছবিখন চাবলৈ কৰ্মচাৰীসকলক অৰ্ধছুটী পৰ্যান্ত দিছিল।
অৰ্থাৎ দ্য কাশ্মীৰী ফাইলছক লৈ বিজেপি দল আৰু বিজেপি চৰকাৰে মোনা ভৰাই ৰাজনীতি কৰিলে। যিসকল কাশ্মীৰী পণ্ডিতৰ ওপৰত নিৰ্মিত ছবিকলৈ মোদী চৰকাৰ আৰু বিজেপিয়ে জুলুঙা ভৰাই ৰাজনীতি কৰিলে তেওঁলোক এতিয়া কেনে আছে?
ছবিখনকলৈ জুলুঙা ভৰাই ৰাজনীতি কৰি কাশ্মীৰী পণ্ডিতৰ বিৰুদ্ধে পিঠি দিছে নেকি চৰকাৰে? কাশ্মীৰী পণ্ডিতৰ জীৱন মৰণকলৈ ৰাজনীতি কৰিছে নেকি মোদী চৰকাৰে? কাশ্মীৰী পণ্ডিতসকলে কেইবামাহ ধৰি কৰি অহা তীব্ৰ প্ৰতিবাদে সমুখলৈ আনিছে এই প্ৰশ্নৰ।
যোৱা জুন মাহৰ পৰাই জন্মুত কাশ্মীৰী পণ্ডিতসকলে নিৰবিচ্ছিন্নভাৱে প্ৰতিবাদ সাব্যস্ত কৰিছে। পি এম পেকেজৰ অধীনৰ কাশ্মীৰী পণ্ডিত কৰ্মচাৰীসকলে নিৰাপত্তাজনিত কাৰণত তেওঁলোকৰ বদলিকৰণৰ দাবী কৰি আহিছে।
যোৱা বছৰৰ মাজভাগত কেইবাগৰাকীও কাশ্মীৰী পণ্ডিত হত্যাৰ বলি হোৱা পাছতে কাশ্মীৰী পণ্ডিতসকল জীৱনৰ নিৰপত্তাহীনতাত ভুগি আহিছে। কাশ্মীৰী পণ্ডিতসকলে কাশ্মীৰ উপত্যকা থকা ঘৰবাৰী ত্যাগ কৰি জম্মু উপত্যকাত গুচি যায়।
ইয়াৰ পাছতে জীৱন আৰু জীৱিকাৰ নিৰাপত্তা বিচাৰি কাশ্মীৰী পণ্ডিতসকলে প্ৰতিবাদ সাব্যস্ত কৰি আহিছে। এই নিৰন্তৰ প্ৰতিবাদে এতিয়া ২৫০ দিন অতিক্ৰম কৰিছে।
পি এম পেকেজৰ অধীনত কাশ্মীৰী পণ্ডিতসকলে কাশ্মীৰৰ পৰিৱৰ্তে দেশৰ অন্যান্য প্ৰান্তলৈ বদলিকৰণৰ দাবী উত্থাপন কৰিছে। কাশ্মীৰী পণ্ডিতসকলৰ দাবী যে কাশ্মীৰত তেওঁলোক আৰু তেওঁলোকৰ সন্তান ভৱিষ্যৎ সুৰক্ষিত নহয়।
কিন্তু চৰকাৰে কাশ্মীৰী পণ্ডিতসকলৰ এই দাবী মানি লোৱাৰ পৰিৱৰ্তে প্ৰত্যাখানহে কৰিছে। আনকি জম্মু-কাশ্মীৰৰ উপ ৰাজ্যপাল মনোজ সিনহাই কৰ্তব্য যোগদান নকৰা কাশ্মীৰ পণ্ডিতসকলৰ দৰমহা বন্ধ কৰা হ’ব বুলি জাননী জাৰি কৰে।
ইয়াৰ পাছতে কাশ্মীৰী পণ্ডিতসকলে আৰ্থিক সংকটত পৰিছে। চৰকাৰে এক সুস্থিৰ সিদ্ধান্ত আৰু জীৱন-জীৱিকাৰ নিৰাপত্তা সুনিশ্চিত কৰাৰ বিপৰীতে এই পদক্ষেপ লোৱাৰ পাছতে কাশ্মীৰী পণ্ডিতসকলে বিজেপিৰ কাৰ্যালয়ত প্ৰতিবাদ সাব্যস্ত কৰিছে।
কাশ্মীৰী পণ্ডিতসকলে সমস্যা সমাধান বিচাৰি প্ৰধানমন্ত্ৰী কাৰ্যালয়লৈ এতিয়ালৈকে অতি কমেও ২৫০০ খন পত্ৰ প্ৰেৰণ কৰিছে। কিন্তু কাশ্মীৰী পণ্ডিতসকলৰ অভিযোগ যে এতিয়াও ৪৫০০ কাশ্মীৰী পণ্ডিতক সুৰক্ষিত স্থানলৈ স্থানান্তৰ কৰাৰ লিখিত আশ্বাস দিয়া নাই চৰকাৰে।
বৰং চৰকাৰে জীৱনকলৈ আতংকগ্ৰস্ত, শংকিত কাশ্মীৰী পণ্ডিতসকলক কাশ্মীৰ উপত্যকালৈ উভতি যাবলৈহে বাধ্য কৰা বুলিও অভিযোগ কৰিছে। অৰ্থাৎ কোনো সুৰক্ষা তথা নিৰাপত্তা ব্যৱস্থা গঢ়ি নোতোলাকৈ কাশ্মীৰী পণ্ডিতসকলক কাশ্মীৰ উপত্যকালৈ ওভতাই পঠোৱাৰ বাবে চৰকাৰীভাৱে হেঁচা প্ৰয়োগ কৰা হৈছে।
এতিয়া প্ৰশ্ন হৈছে, বিবেক অগ্নিহোত্ৰী প্ৰপাগ’ণ্ডাধৰ্মী ছবি দ্য কাশ্মীৰ ফাইলছক লৈ হৈ চৈ কৰি ৰাজনীতিৰে মুনাফা লোৱা মোদী চৰকাৰে কিয় কাশ্মীৰ পণ্ডিতৰ দাবীৰ প্ৰতি সহানুভূতিশীল নহয়?
মুনাফা লাভৰ ৰাজনীতি কৰাৰ বাবেই চাগে প্ৰধানমন্ত্ৰী মোদী চৰকাৰে কাশ্মীৰী পণ্ডিতৰ ২৫০ দিনৰো অধিক অবিৰত প্ৰতিবাদক কোনো ভ্ৰূক্ষেপ নকৰি কাশ্মীৰী পণ্ডিতৰ জীৱন-জীৱিকাক লৈ হয়তো হেতালি খেলি আহিছে।