একেটা পৰিয়ালতে ২৬জনকৈ লোক ক’ভিডত আক্ৰান্ত হৈছিল।
তাৰ মাজতে ৮৭ বৰ্ষীয় এজন বৃদ্ধও আছিল।
বৃদ্ধজনে কেইবছৰমানৰ পূৰ্বে নিজৰ এটা কিডনিও দান কৰিছিল।
পৰিয়ালটোৰ আটাইকেওজন লোক বৰ্তমান ক’ভিডৰ পৰা সম্পূৰ্ণ সুস্থ হৈ পৰিছে।
পৰিয়ালৰ তৰফৰ পৰা জনা গৈছে, চিকিৎসকৰ পৰামৰ্শ মানি চলাৰ ফলতে তেওঁলোকৰ হাৰ মানিছে ভাইৰাচে।
উত্তৰ প্ৰদেশৰ প্ৰয়াগৰাজৰ এই পৰিয়ালটোৰ এই সফলতাই আশাৰ বতৰা কঢ়িয়াই আনিছে স্থানীয় লোকসকলৰ মনত।
৮৭ বৰ্ষীয় বৃদ্ধজনৰ নাম ৰাঘবেন্দ্ৰ মিশ্ৰ।
বৃদ্ধজনৰ যৌথ পৰিয়ালটোত মুঠ ৩১জন সদস্য আছে।
প্ৰয়াগৰাজৰ আজাদ নগৰৰ বাসিন্দা ৰাঘৱেন্দ্ৰ যোৱা ১১ এপ্ৰিল তাৰিখে ক’ভিডত আক্ৰান্ত হৈছিল।
তাৰ পাছত ১০ দিনৰ ভিতৰতে পৰিয়ালটোৰ ২৫জনকৈ সদস্য আক্ৰান্ত হয়।
কিন্তু বৰ্তমান আটাইকেওজন সদস্য ধীৰে ধীৰে সুস্থ হৈ উঠিছে।
ক’ভিডৰ পৰা মুক্তি লাভ কৰা ৰাঘবেন্দ্ৰৰ পুত্ৰ ৰবীন্দ্ৰ মিশ্ৰই জনোৱামতে বিগত একমাহ ধৰি তেওঁলোকে আইচলেচনত আছিল আৰু চিকিৎসকৰ পৰামৰ্শ মানি ঔষধ খোৱাৰ উপৰিও পৰিয়ালৰ প্ৰত্যেকেই যোগাভ্যাস কৰিছে।
তদুপৰি হালধিসনা গাখীৰো পান কৰিছে বুলি তেওঁ জনায়।
”এতিয়া আমাৰ পৰিয়ালৰ প্ৰত্যেকেই সুস্থ হৈ উঠিছে আৰু ভালে আছে।”- তেওঁ কয়।