মাজনিশা হঠাতে ফেচবুক লাইভলৈ আহিছিল কাছাৰৰ জয়দীপ। ফেচবুক লাইভলৈ অহাৰ আগতে পৰিয়ালৰ সকলো সদস্যকে ব্লক কৰি লৈছিল জয়দ্বীপে।
লাইভলৈ আহিয়েই পৰিয়ালৰ সকলোকে উদ্দেশ্যি জয়দ্বীপে কৈছিল – “মা, খুড়া, পেহী, ভনী, দাদা, ভতিজী, জোঁৱাই মই আপোনালোকৰ ওচৰত দুঃখিত! মই আপোনালোক সকলোকে ভাল পাওঁ। কিন্তু মই মোৰ প্ৰেমিকাক বৰ ভাল পাওঁ।”
এইদৰে ফেচবুক লাইভত কৈ কান্দি উঠিছিল জয়দ্বীপ নামৰ যুৱকজনে। আৰু তাৰ পিছতে লৈছিল এক চৰম সিদ্ধান্ত।
এটা মেডিকেল কোম্পানীত কাম কৰা কাছাৰৰ জয়দ্বীপ এজন ২৭ বছৰীয়া চফল যুৱক। জয়দ্বীপৰ জ্যেষ্ঠ ভাতৃয়ে সংবাদ মাধ্যমক জনোৱা মতে তেওঁৰ কনিষ্ঠ ভাতৃ জয়দ্বীপ শিলচৰৰ ভাড়াঘৰত থাকে।
আত্মহত্যাৰ কথা গম পোৱাৰ পিছত ককায়েকে ভাড়াঘৰৰ মালিকক খবৰ দিয়ে। ভাড়াঘৰৰ মালিক খৰধৰকৈ গৈ কোঠাৰ দূৱাৰ খোলে। কিন্তু তেতিয়ালৈকে সকলো শেষ হৈ গৈছিল। চিলিং ফেনত ওলমি আছিল মৃত জয়দ্বীপ।
ইতিমধ্যে আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে। ইফালে প্ৰেমৰ এই ভয়াবহ পৰিণতিৰ সমগ্ৰ অঞ্চলজুৰি সৃষ্টি হৈছে তীব্ৰ চাঞ্চল্যৰ। দুখত ম্ৰিয়মাণ হৈ পৰিছে জয়দ্বীপৰ পৰিয়াল।