শাওন মহীয়া বানত ৰাজ্যখনৰ বিভিন্ন অঞ্চলত হাহাকাৰ অৱস্থাৰ সৃষ্টি হোৱাৰ সময়তে বাক্সা জিলাৰ তামুলপুৰ ৰাজহ চক্ৰৰ অন্তৰ্গত বৰবিলা গাঁওত গৃহহাৰা হৈছে বহু পৰিয়াল। সম্প্ৰতি পাগলাদিয়া নৈৰ গৰাখহনীয়াই ভয়ংকৰ ৰূপ ধাৰণ কৰিছে গাৱখনত।
উল্লেখ্যোগ্য যে, বিগত কিছু দিন ধৰি হোৱা মূষলধাৰ বৰষুণৰ ফলত পাগলাদিয়া নৈৰ পানী ফেনে ফোঁটোকাৰে বাঢ়ি বৰবিলা গাঁও জলমগ্ন কৰি পেলায়। বানপানীৰ সমান্তৰালভাৱে গাঁৱখনত নৈৰ গৰাখহনীয়াই তীব্ৰ ৰূপ ধাৰণ কৰিছে ।
ইতিমধ্যে শেহতীয়া বান আৰু গৰাখহনীয়াৰ কবলত পৰি গাঁৱখনৰ ২৯ টা পৰিয়াল গৃহহাৰা হৈ সৰ্বশ্ৰান্ত হ’বলগীয়া হৈছে। প্ৰাপ্ত তথ্য মতে গাঁৱখনৰ জামিৰণ নেচা, আব্দুল হক, চলেমন আলী, ফিৰোজা খাতুন, কুদ্দুচ আলী, জাবেদ আলী, জমিৰ আলী, আব্দুল খালেক, আইনাল হক, চালাম আলী আদিকে ধৰি ২৯ টা পৰিয়ালৰ ঘৰ-দুৱাৰ, ভেটি -মাটি নৈৰ খহনীয়াত জাহ গৈছে।
পৰিয়াল সমূহৰ ভিতৰত কেইবাটাও প্ৰধানমন্ত্ৰী গ্ৰাম্য আবাস যোজনাৰ গৃহ নৈখনৰ বুকুত জাহ যায়। সম্প্ৰতি এই ২৯ টা পৰিয়ালৰ ১৬২ গৰাকী সদস্যৰ জীৱনলৈ ঘোৰ অমানিশা নামি আহিছে । নিজৰ থকা ঘৰটো, ভেটি-মাটি আৰু সম্পত্তি হেৰুৱাই স্বাভাৱিকতেই বিনিদ্ৰ ৰজনী কটাব লগীয়া হৈছে অঞ্চলটোৰ শিশু সহ পুৰুষ মহিলাসকলে।
জানিব পৰা মতে গৃহহীন লোকসকলে বৰ্তমান গাৱখনৰ এটা মছজিদত আশ্ৰয় গ্ৰহণ কৰি আছে ।লক্ষণীয় যে, এই সকল দুৰ্ভগীয়া লোকে আশ্ৰয় গ্ৰহণ কৰি থকা মছজিদটোও সম্প্ৰতি নৈ খনৰ বুকুত জাহ যোৱাৰ উপক্ৰম হৈছে।
আনহাতে, এই সকল দুৰ্ভগীয়া লোকৰ উপৰি গাৱখনৰ বানাক্ৰান্ত লোকসকলৰ দুখ-দুৰ্দশাৰ বুজ লৈছে ৰাজ্যৰ সমাজ কল্যাণ বিভাগৰ মন্ত্ৰী প্ৰমিলা ৰাণী ব্ৰহ্ম, তামুলপুৰ বিধান সভা সমষ্টিৰ বিধায়ক ইমানুৱেল মুছাহাৰী, বি টি চিৰ কাৰ্যবাহী সদস্য দেবেন বড়োৱে।
মন্ত্রী প্ৰমীলা ৰাণী ব্ৰহ্মই এক দীৰ্ঘম্যাদী আঁচনিৰ জৰিয়তে গাৱখনত নৈৰ গৰাখহনীয়া প্ৰতিৰোধৰ আশ্বাস দিছে। তাৰোপৰি, বি টি চিৰ কাৰ্যবাহী সদস্য দেবেন বড়োৱে একক প্ৰচেষ্টাৰে এই সকল লোকৰ মাজত খাদ্য সামগ্ৰী বিতৰণ কৰাৰ ব্যৱস্থা কৰে।
