তিনিচুকীয়া জিলাৰ মাৰ্ঘেৰিটা মহকুমাৰ লিডুৰ বাৰ্মা কেম্পত হোৱা এটা ভয়ংকৰ পথ দুৰ্ঘটনাত তিনিজন লোকৰ থিতাতে নিহত হৈছে।
৩১৫ নং ৰাষ্ট্ৰীয় ঘাইপথৰ ওপৰত এই মৰ্মান্তিক দুৰ্ঘটনাটো আজি দিনৰ প্ৰায় ২বজাত ঘটে।
এখন Hero Splendour মটৰ চাইকেল(S23U8663) আৰু এখন স্কুটিত অহা মুঠ ৪জন ব্যক্তিক তীব্ৰ বেগী ডাম্পাৰ এখনে সন্মুখৰ পৰা খুন্দা মৰাত স্কুটি আৰোহী দুজন আৰু বাইক আৰোহী এজন থিতাতে নিহত হয়। বাইকত অহা মহিলাগৰাকী গুৰুতৰভাৱে আহত হৈছে।
আহত মহিলাগৰাকীক ততাতৈয়াকৈ উন্নত চিকিৎসাৰ বাবে মাৰ্ঘেৰিটা অসামৰিক চিকিৎসালয়লৈ প্ৰেৰণ কৰা হয়৷
জানিব পৰা গৈছে যে বাইক আৰু স্কুটি আৰোহীসকল লিডুৰ পৰা জাগুন অভিমুখে গৈ আছিল। ডাম্পাৰখন জাগুনৰ পৰা লিডু অভিমুখে আহি আছিল।
বাতৰি প্ৰেৰণ কৰা সময়লৈকে নিহত ৩জন ব্যক্তিক চিনাক্ত কৰিব পৰা হোৱা নাই।
আনহাতে দুৰ্ঘটনা সংঘটিত কৰি পলায়ন কৰা ডাম্পাৰখনকো বাতৰি লিখা পৰলৈকে জব্দ কৰিবলৈ সক্ষম হোৱা নাই আৰক্ষী৷
উল্লেখযোগ্য যে ৰাজ্যত শেহতীয়া দুবছৰ মানত তীব্ৰবেগী ডাম্পাৰ খুন্দাত বহু লোকে প্ৰাণ হেৰুৱাইছে। তৎসত্ত্বেও প্ৰশাসনে ডাম্পাৰ চালকৰ বাবে কোনো নীতি-নিয়ম বান্ধি দিয়া নাই।