কাইলৈ অৰ্থাৎ ৩১ অক্টোবৰৰ পিছত হয়টো বন্ধ হৈ পৰিব পাৰে ভাৰতৰ প্ৰায় ৭ কোটি মোবাইল য়ুজাৰৰ নম্বৰ। নম্বৰ বন্ধ নহ’বৰ বাবে য়ুজাৰসকলে টেলিকম ৰেগুলেট’ৰি অৱ ইণ্ডিয়া (TRAI)-এ বান্ধি দিয়া উক্ত সময়সীমাৰ ভিতৰত তেওঁলোকৰ নম্বৰসমূহ প’ৰ্ট কৰিব লাগিব।
যদি এই য়ুজাৰসকলে তেওঁলোকৰ নম্বৰসমূহ ৩১ অক্টোবৰৰ ভিতৰত প’ৰ্ট নকৰে তেন্তে ইয়াৰ পিছত আৰু কোনো দিন সেই নম্বৰ এক্টিভেত কৰিব নোৱাৰিব বুলি TRAIৰ ফালৰ পৰা সদৰী কৰা হৈছে।
উল্লেখযোগ্য যে এই ৭ কোটি চিম হৈছে বন্ধ হৈ পৰা টেলিকম কোম্পানি এয়াৰচেল (Aircel)ৰ। ২০১৮ চনত ৰিলায়েঞ্চ জিঅ’ তথা আন টেলিকম কোম্পানি সমূহৰ পৰা পোৱা তীব্ৰ প্ৰত্যাহ্বানৰ পিছত লোকচানত ডুব গৈ থকা এয়াৰচেলে ভাৰতত তেওঁলোকৰ নেটৱৰ্ক ছাৰ্ভিছ বন্ধ কৰিবলৈ বাধ্য হৈছিল।
সেই সময়ত সমগ্ৰ দেশতে তেওঁলোকৰ প্ৰায় ৯ কোটি গ্ৰাহক আছিল। এই ৯ কোটি য়ুজাৰে যাতে তেওঁলোকৰ মোবাইল নম্বৰ আন নেটৱৰ্কলৈ সলনি কৰিব পাৰে তাৰ বাবে কোম্পানিটোৱে TRAIক উক্ত গ্ৰাহকসকলৰ বাবে একোটা ইউনিক প’ৰ্টিং ক’ড অৰ্থাৎ UPC দিবলৈ অনুৰোধ জনাইছিল।
TRAIৰ মতে এতিয়ালৈকে ইয়াৰে ২ কোটি গ্ৰাহকে আন নেটৱৰ্কলৈ তেওঁলোকৰ নম্বৰসমূহ প’ৰ্ট কৰিলে যদিও এই পৰ্যন্ত ৭ কোটি য়ুজাৰে তেওঁলোকৰ নম্বৰ প’ৰ্ট কৰা নাই।
কিদৰে এয়াৰচেলৰ গ্ৰাহকসকলে তেওঁলোকৰ নম্বৰ কৰিব পাৰিব :
সেৱা বন্ধ কৰাৰ সময়ত এয়াৰচেলে তেওঁলোকৰ গ্ৰাহকসকলক এয়াৰচেলৰ ৱেবছাইটত গৈ নম্বৰ প’ৰ্ট কৰিবলৈ অনুৰোধ জনাইছিল, কিন্তু কিছুদিনৰ পিছতে এয়াৰচেলৰ ৱেবছাইটটো বিকল হৈ পৰে। ফলত এতিয়া য়ুজাৰসকলে মেনুয়েলি তেওঁলোকৰ নম্বৰ প’ৰ্ট কৰিব লাগে।
মেনুয়েলি প’ৰ্ট কৰিবৰ বাবে য়ুজাৰসকলে প্ৰথমতে UPC ক’ডটো উলিয়াব লাগিব। ইয়াৰ বাবে তেওঁলোকে নিজৰ মেছেজ ব’ক্সত গৈ PORT আৰু তেওঁলোকৰ মোবাইল নম্বৰটো লিখি তাক ১৯০০ নম্বৰত প্ৰেৰণ কৰিব লাগিব।
মেছেজটো প্ৰেৰণ কৰাৰ কিছু সময় পিছত এটা SMSৰ জৰিয়তে তেওঁলোকে UPC ক’ডটো লাভ কৰিব। উক্ত ক’ডটোৰ জৰিয়তে এয়াৰচেলৰ য়ুজাৰসকলে আন নেটৱৰ্কলৈ নিজৰ নম্বৰটো পৰ্ট কৰিব পাৰিব।
