প্ৰধানমন্ত্ৰীকে ধৰি বহু কেইগৰাকী শীৰ্ষ ৰাজনীতিকৰ বাৰম্বাৰ আহ্বানৰ পিছতো ক্ষান্ত হোৱা নাই প্ৰতিবাদী কৃষকসকল।
কোনো কাৰণত তিনিখনকৈ বিতৰ্কিত কৃষি আইন বাতিল নোহোৱা পৰ্যন্ত আন্দোলন প্ৰত্যাৰ কৰিবলৈ সন্মত হোৱা নাই কৃষকসকলে।
দিল্লীৰ তেজ গোট মৰা শীতৰ মাজতে প্ৰতিবাদ অব্যাহত ৰখা কৃষকসকলৰ মাজৰে ৩৩ জনৰ ইতিমধ্যে শীত প্ৰৱাহৰ ফলত প্ৰতিবাদস্থলীতে মৃত্যু ঘটিছে।
নিজৰ ঘৰৰ পৰা হাজাৰ কিলোমিটাৰ নিলগত এনেদৰে প্ৰাপ্য অধিকাৰৰ বাবে আন্দোলন কৰিবলৈ আহি মৃত্যুক সাৱটি লোৱা ৩৩ গৰাকী কৃষকৰ আত্মাৰ সদগতি কামনা কৰি আজি নিখিল ভাৰত কৃষক সভাই সমগ্ৰ দেশতে শ্ৰদ্ধাঞ্জলি দিৱসৰ আয়োজন কৰিছে।
সেই মৰ্মে আজি দিনৰ ১১ বজাৰ পৰা দুপৰীয়া ১ বজালৈ দেশৰ প্ৰায় ১ লাখ খন গাওঁত এই শ্ৰদ্ধাঞ্জলি অনুষ্ঠান পালন কৰা হ’ব।
শেহতীয়াকৈ কেন্দ্ৰীয় চৰকাৰে প্ৰণয়ন কৰা তিনিখন কৃষি আইন বাতিলৰ দাবীত যোৱা ২৬ নৱেম্বৰত দিল্লী চ’লো কাৰ্যসূচীৰে দেশৰ কৃষকসকলে আৰম্ভ কৰিছিল কৃষক বিদ্ৰোহ।
কেন্দ্ৰীয় চৰকাৰে বিদ্ৰোহী কৃষকসকলক সীমান্তত দিল্লী প্ৰৱেশত বাধা প্ৰদান কৰে। দিল্লী সংযোগী সকলো পথকে বিদ্ৰোহী কৃষকক প্ৰৱেশ নিষিদ্ধ কৰি বন্ধ কৰি দিলে দিল্লী আৰক্ষীয়ে।
ইয়াৰ পিছতে দিল্লী অভিমুখী বিদ্ৰোহী কৃষকসকলে দিল্লীৰ সীমান্তৱৰ্তী অঞ্চলসমূহত অৱস্থান কৰিবলৈ বাধ্য হৈ পৰে।
হাৰিয়ানা অতিক্ৰম কৰি অহা পঞ্চাৱৰ কৃষকৰ লগতে হাৰিয়ানাৰ হাজাৰ হাজাৰ কৃষকে হাৰিয়ানা-দিল্লী চিঙ্ঘু সীমান্তত যোৱা ২৬ নৱেম্বৰৰ পৰা ২৪ দিন প্ৰচণ্ড শীততো দিন ৰাতি একাকাৰ কৰি কৃষক বিদ্ৰোহ অব্যাহত ৰাখিছে।
ইফালে চিঙ্ঘু সীমান্ততে বুধবাৰে কৃষক বিদ্ৰোহৰ প্ৰতি নিজৰ জীৱন উছৰ্গা কৰি বাবা ৰাম সিং নামৰ শিখ ধৰ্মগুৰু এজনে আত্মহত্যা কৰিছে।
“আমি প্ৰচণ্ড শীত আৰু শীত প্ৰৱাহৰ সৈতে যুঁজিব লগা হৈছে। প্ৰচণ্ড শীত আৰু বৰষুণ হ’লেও আমি আমাৰ দাবী পূৰণ নোৱোহালৈকে ইয়াত প্ৰতিবাদ কৰি থাকিম।” এজন কৃষকে কয়।
