ক’ৰ’নাৰ প্ৰভাৱ; আমেৰিকা যুক্তৰাষ্ট্ৰত নিবনুৱা হিচাপে নাম অন্তৰ্ভূক্ত ৩৮.৬ মিলিয়ন লোকৰ
ক’ৰ’না ভাইৰাছৰ সংক্ৰমণে ভয়াবহভাৱে জোকাৰি যোৱা আমেৰিকা যুক্তৰাষ্ট্ৰত বিগত সপ্তাহত নতুনকৈ ২.৪ মিলিয়ন লোকে নিবনুৱা হিচাপে নিজৰ নাম অন্তৰ্ভূক্ত কৰে।
বিগত সপ্তাহত নিবনুৱা হিচাপে নাম অন্তৰ্ভূক্ত কৰা ২.৪ মিলিয়ন লোকক ধৰি বিগত ৯ সপ্তাহত আমেৰিকা যুক্তৰাষ্ট্ৰত মুঠ ৩৮.৬ মিলিয়ন লোকে নিবনুৱা হিচাপে নিজৰ নাম অন্তৰ্ভূক্ত কৰিছে।
আমেৰিকা যুক্তৰাষ্ট্ৰৰ কেলিফ’ৰ্নিয়া, নিউয়ৰ্ক আৰু ৱাশ্বিংটন আদিত নিবনুৱাৰ সংখ্যা ক্ৰমাগতভাৱে হ্ৰাস পোৱা বুলি দাবী কৰাৰ সময়তে আমেৰিকাত নিবনুৱাৰ তালিকাত নাম অন্তৰ্ভূক্ত কৰা লোকৰ সংখ্যা বৃদ্ধি পাবলৈ ধৰিছে।
এগৰাকী বিশেষজ্ঞই দাবী কৰা মতে আমেৰিকাত ২০২১ লৈ নিবনুৱাৰ সংখ্যা আৰু অধিক বৃদ্ধি পাব।
উল্লেখযোগ্য যে, সমগ্ৰ বিশ্বৰ ভিতৰত বৰ্তমানলৈ আমেৰিকা যুক্তৰাষ্ট্ৰ ক’ৰ’না ভাইৰাছৰ ফলত সৰ্বাধিক ক্ষতিগ্ৰস্ত হৈছে।
আমেৰিকাত ১৫ লাখতকৈ অধিক লোক ক’ৰ’না ভাইৰাছৰ দ্বাৰা আক্ৰান্ত হোৱাৰ বিপৰীতে ৯০ হাজাৰতকৈ অধিক লোকৰ ক’ৰ’না ভাইৰাছৰ ফলত মৃত্যু হৈছে।
আমেৰিকাত ক’ৰ’নাৰ সংক্ৰমণ আৰু ইয়াৰ ফলত সৃষ্টি হোৱা নিবনুৱা সমস্যাই ৰাষ্ট্ৰপতি ড’নাল্ড ট্ৰাম্পক আগন্তুক ৰাষ্ট্ৰপতি নিৰ্বাচনৰ পূৰ্বে যথেষ্ট চিন্তিত কৰি তুলিছে।