বৃহস্পতিবাৰে বিজেপিত যোগ দিব ৩ বাৰৰ বিধায়ক জেষ্ঠ কংগ্ৰেছী নেতাই
অসম প্ৰদেশ কংগ্ৰেছত অব্যাহত আছে খহনীয়া। লোকসভা নিৰ্বাচনত কংগ্ৰেছৰ বেয়া ফলাফলৰ পাছত ইজনৰ পাছত সিজন কংগ্ৰেছী জেষ্ঠ নেতাই দল ত্যাগ কৰি বিজেপিমুখি হোৱা পৰিলক্ষিত হৈছে।
ইতমধ্যে কংগ্ৰেছৰ পৰা পদত্যাগ কৰা তিনিচুকীয়াৰ প্ৰাক্তন বিধায়ক ৰাজেন্দ্ৰ প্ৰসাদ সিঙে বৃহস্পতিবাৰে আনুষ্ঠানিকভাৱে বিজেপিত যোগদান কৰিব বুলি খবৰ লাভ কৰা হৈছে।
বৃহস্পতিবাৰে ৰাজ্যিক বিজেপিৰ কাৰ্যালয়ত এখন সভাত আনুষ্ঠানিকভাৱে প্ৰাক্তন কংগ্ৰেছী নেতাগৰাকীয়ে গেৰুৱা দলটোৰ সদস্য পদ গ্ৰহণ কৰিব বুলি বিশেষ সূত্ৰৰ পৰা লাভ কৰা খবৰত প্ৰকাশ পাইছে।
উল্লেখযোগ্য যে, উজনি অসমত প্ৰদেশ কংগ্ৰেছৰ শক্তিশালী ভেটি গঢ়া এগৰাকী উল্লেখযোগ্য কাণ্ডাৰী ৰাজেন্দ্ৰ প্ৰসাদ সিঙে ২০০১ চনৰ পৰা ২০১৬ চনলৈ তিনিবাৰ তিনিচুকীয়াৰ বিধায়ক হিচাপে অসম বিধান সভালৈ নিৰ্বাচিত হৈছিল।
২০১৬ চনৰ বিধানসভা নিৰ্বাচত সঞ্জয় কিষাণে ৰাজেন্দ্ৰ প্ৰসাদ সিঙক পৰাস্ত কৰাৰ পাছতে সমষ্টিটোত ক্ৰমান্বয়ে কংগ্ৰেছে জনসমৰ্থন হেৰুৱাবলৈ আৰম্ভ কৰিছিল।
আনহাতে, কংগ্ৰেছৰ আন এগৰাকী জেষ্ঠ নেতা তথা প্ৰাক্তন প্ৰদেশ কংগ্ৰেছৰ সভাপতি আৰু ৰাজ্যসভাৰ সাংসদ ভূৱনেশ্বৰ কলিতায়ো আনুষ্ঠানিকভাৱে কংগ্ৰেছ ত্যাগ কৰা বুলি ঘোষণা কৰিছিল।
এনেদৰে ইজনৰ পাছত সিজন জেষ্ঠ কংগ্ৰেছী নেতাৰ পদত্যাগে ৰাজ্যত কংগ্ৰেছ নেতৃত্বৰ ওপৰত প্ৰশ্নবোধকৰ সৃষ্টি কৰিছে।