ফেইচবুক কৰ্তৃপক্ষৰ শেহতীয়া এটা অসতৰ্কতাৰ ফলত ৪০ কোটি ফেইচবুক য়ুজাৰৰ ফোন নম্বৰৰ গোপনীয়তা উন্মোচিত হৈ পৰিছে বুলি দাবী কৰিছে প্ৰযুক্তি বিষয়ক এটা ৱেবছাইট TechCrunch-এ।
অৱশ্যে ফেইচবুক কৰ্তৃপক্ষই এই পৰিমাণ আৰু গোপনীয়তা উন্মোচিত হোৱাৰ পৰা হ’ব পৰা ক্ষতি প্ৰতিবেদনটোৱে দাবী কৰা ধৰণৰ নহয় বুলি কৈছে।
TechCrunch-ৰ এই দাবীৰ ভিত্তিত ৪ ছেপ্টেম্বৰত আমেৰিকাৰ সংবাদ মাধ্যমে বাতৰি দি কয় যে ৪০০ মিলিয়নতকৈ অধিক ফেইচবুক একাউণ্টৰ সৈতে সম্পৰ্কিত ফোন নম্বৰবোৰ অনলাইনত তালিকাবদ্ধ কৰা হৈছিল, যিটো বিয়াগোম ছ’চিয়েল মিডিয়াটোৰ গোপনীয়তা সম্পৰ্কীয় ত্ৰুটি।
ডেটাবেইছবোৰে ফেইচবুক য়ুজাৰ আই ডিবোৰ, অৰ্থাৎ প্ৰতিটো একাণ্টৰ সৈতে সংলগ্ন হৈ থকা মৌলিক সংখ্যাবোৰ, প্ৰফাইল ফোন নম্বৰবোৰ আৰু কিছুমান একাউণ্টৰ দ্বাৰা দিয়া লিংগ সম্পৰ্কীয় তথ্য আৰু তেওঁলোকৰ ভৌগোলিক অৱস্থান তালিকাবদ্ধ কৰি ৰাখিছিল, TechCrunch-ৰ প্ৰতিবেদনটোত দাবী।
য়ুজাৰৰ ফোন নম্বৰবোৰ ৰাজহুৱা হোৱাটোৱে সেই য়ুজাৰসকলৰ বাবে স্পেম কল, ছিম-ছোৱাপিং আদিৰ দৰে অসুবিধাৰ সৃষ্টি কৰিব পাৰে, যিটো অলপতে টুইটাৰৰ মুখ্য কাৰ্য্যবাহী বিষয়া জেক দৰ্ছিৰ ক্ষেত্ৰত হৈছিল। এনে অৱস্থাই হেকাৰক এই উজু হৈ পৰা একাউণ্টবোৰৰ পাছৱৰ্ড জোৰ কৰি সলাবলৈ সক্ষম কৰি তুলিব।
প্ৰযুক্তি সম্পৰ্কীয় ৱেবছাইটটোৱে দাবী কৰে যে গোপনীয়তাৰ ব্যৱস্থা নথকা ছাৰ্ভাৰ এটাত কেইবাটাও ডেটাবেইছত য়ুজাৰ সম্পৰ্কীয় ৪১৯ নিযুত তথ্য ৰখা হৈছিল। ইয়াৰে ১৩৩ নিযুত একাউণ্ট আমেৰিকাৰ, ৫০ মিলিয়ন ভিয়েটনামৰ আৰু ১৮ মিলিয়ন ব্ৰিটেইনৰ য়ুজাৰৰ।
ছাৰ্ভাৰটো পাছৱৰ্ডৰ দ্বাৰা সুৰক্ষিত নাছিল আৰু ইয়াৰ অৰ্থ হ’ল যিকোনো লোকেই ডেটাবেছবোৰ ঢুকি পাব পাৰে। এইবোৰ ৪ ছেপ্টেম্বৰ পৰ্য্যন্ত, যিদিনা TechCrunch-এ ছাইটটোৰ হ’ষ্টক যোগাযোগ কৰিছিল, অনলাইন হৈ আছিল।
ফেইচবুকে এই প্ৰতিবেদনটোৰ কিছু অংশৰ সত্যতাহে স্বীকাৰ কৰিছে আৰু কয় যে একাউণ্টৰ পৰিমাণ প্ৰতিবেদনটোৱে দাবী কৰাৰ প্ৰায় আধা সংখ্যকহে বুলি এই পৰ্য্যন্ত নিশ্চিত কৰা হৈছে।
এই এণ্ট্ৰিবোৰৰ বহু সংখ্যকেই নকল (duplicates) আছিল আৰু তথ্যবোৰ পুৰণি। কোনো ফেইচবুকে কোনো একাউণ্টৰ ক্ষেত্ৰতে শিথিলতা অৱলম্বন কৰাৰ প্ৰমাণ নাই বুলি ফেইচবুকৰ মুখপাত্ৰই এ এফ পিক কয়।