মহামাৰী ক’ৰ’ণাই কেৱল বহু লোকৰে জীৱনেই কাঢ়ি নিয়া নাই,বহুতকে কৰিছে কৰ্মহীনো।
লকডাউনৰ ফলত ভাঙি পৰিছে বিশ্বৰ অৰ্থনীতি। ইয়াৰ ব্যতিক্ৰম ঘটা নাই ভাৰততো।
ভাৰততো কোটিৰ ঘৰত লোকে হেৰুৱাইছে বেচৰকাৰী প্ৰতিষ্ঠানৰ চাকৰি। ফলত পানীত হাঁহ নচৰা অৱস্থা হৈছে বহুতৰে।
চাকৰি হেৰুওৱা লোক সকলক লৈ বিৰোধীয়ে বিজেপি নেতৃত্বাধীন চৰকাৰ খনক হেঁচা মাৰি ধৰিছে।
এনে সময়তে কেন্দ্ৰীয় চৰকাৰে ক’ৰ’ণাতংকৰ বাবে কাম হেৰুওৱা দেশৰ লাখ লাখ শ্ৰমিক-কৰ্মচাৰীক সকাহ দিবলৈ আগুৱাই আহিছে।
ক’ৰ’ণাতংকৰ সময়তে চলিত বৰ্ষৰ ২৪ মাৰ্চৰ পৰা ৩১ ডিচেম্বৰৰ ভিতৰত যিসকল শ্ৰমিক-কৰ্মচাৰীয়ে কাম হেৰুৱাইছে বা হেৰুৱাব তেওঁলোকক চৰকাৰে তিনিমাহৰ আধা দৰমহা দিব।
অৱশ্যে কাম হেৰুওৱা সকলো শ্ৰমিক-কৰ্মচাৰীয়ে এই সুবিধা নাপায়।
এই সুবিধা কেৱল দেশৰ সেই সকল শ্ৰমিক-কৰ্মচাৰীকহে দিয়া হ’ব যিসকলৰ ESIC আছিল। ESIC থকা শ্ৰমিক-কৰ্মচাৰী সকলে আকৌ কমেও দুবছৰ এই সুবিধা পোৱা হ’ব লাগিব।
অৰ্থাৎ দুবছৰ আগৰে পৰা ESIC থকা শ্ৰমিক-কৰ্মচাৰী সকলে তেওঁলোকৰ কাষৰে ESIC কাৰ্যালয়ত তিনি মাহৰ আধা দৰমহাৰ বাবে আবেদন কৰিব পাৰিব।
চৰকাৰৰ এনে ব্যৱস্থাই ক’ৰ’ণাতংকৰ সময়ত কাম হেৰুওৱা প্ৰায় ৪০ লাখ শ্ৰমিক-কৰ্মচাৰীক উপকৃত কৰিব।
