দেশৰ দ্ৰুত পৰিবাহী ৰে’লসেৱা হিচাপে কেন্দ্ৰীয় চৰকাৰে এই বৰ্ষত আৰম্ভ কৰা বন্দে ভাৰত এক্সপ্ৰেছ নামৰ বিশেষ ৰে’লৰ সংখ্যা বৃদ্ধি পোৱাৰ সম্ভাৱনা আছে। অহা বৰ্ষত কেন্দ্ৰীয় চৰকাৰে দাখিল কৰিবলগীয়া বাজেটত প্ৰায় ৪০০ খন নতুন বন্দে ভাৰত এক্সপ্ৰেছ ৰে’ল মুকলিত অনুমোদন জনাব পাৰে।
আগন্তুক কেন্দ্ৰীয় বাজেটত ভাৰতীয় ৰে’লৱেৰ বাবে আবণ্টিত হ’বলগীয়া সৰ্বাধিক বাজেটৰ আওতাত এই নতুন বন্দে ভাৰত ৰে’ল ঘোষণা কৰা হ’ব পাৰে বুলি ৰে’ল মন্ত্ৰালয়ৰ সূত্ৰই প্ৰকাশ কৰিছে।
ৰে’ল মন্ত্ৰী অশ্বিনী বৈষ্ণৱে ৰাষ্ট্ৰীয় সংবাদ মাধ্যমৰ আগত উল্লেখ কৰা মতে, ২০২৪ চনৰ প্ৰথম তিনি মাহৰ ভিতৰত শ্লীপাৰ কোচযুক্ত প্ৰথমখন বন্দে ভাৰত ৰে’ল মুকলি কৰা হ’ব।
সংবাদ মাধ্যমৰ এক অনুষ্ঠানত বক্তব্য ৰাখি ৰে’ল মন্ত্ৰীগৰাকীয়ে লগতে কয় যে অহা তিনি বছৰত ৪৭৫ খন বন্দে ভাৰত ৰে’ল নিৰ্মাণৰ পৰিকল্পনা কৰা হৈছে।
অশ্বিনী বৈষ্ণৱে কয়, “৪৭৫ খন বন্দে ভাৰত ৰে’ল মুকলিৰ লক্ষ্য নিৰ্ধাৰণ কৰা হৈছে। বাজেটত ৪০০ খন ৰে’ল অনুমোদন কৰা হৈছিল আৰু তাৰ পূৰ্বে ৭৫খন ৰে’ল অনুমোদন কৰা হৈছিল। আমি অনাগত তিনি বছৰত নিৰ্ধাৰিত লক্ষ্যত উপনীত হ’ম।”
এই ৰে’লসমূহে অৱশ্যে দিল্লী-মুম্বাই, দিল্লী-হাওৰা আদি মুখ্য ৰে’ল পথসমূহত বৰ্তমান চলি থকা ৰাজধানী এক্সপ্ৰেছ আৰু ডুৰন্টো ৰে’লৰ ঠাই ল’ব নে নহয়, সেই সন্দৰ্ভত এতিয়াও সিদ্ধান্ত লোৱা হোৱা নাই।
ইফালে, এজন জ্যেষ্ঠ বিষয়াই জানিবলৈ দিয়া মতে, ২০২৫-২৬ চনৰ ভিতৰত ভাৰতীয় ৰে’লৱেই ইউৰোপ, দক্ষিণ আমেৰিকা আৰু পূব এছিয়াৰ বজাৰলৈ বন্দে ভাৰত ৰে’লৰ প্ৰধান ৰপ্তানিকৰ্তা হিচাপে পৰিগণিত হোৱাৰ পৰিকল্পনা কৰিছে।
