শেহতীয়াকৈ এক গ্ৰন্থ উন্মোচনী অনুষ্ঠানত উপ-ৰাষ্ট্ৰপতি জগদীপ ধনখৰে ভাৰতীয় সংবিধানৰ প্ৰস্তাৱনাক “অপৰিবর্তনীয়” বুলি অভিহিত কৰি সংবিধানৰ ভেটি বুলি উল্লেখ কৰে যদিও তেওঁ স্বীকাৰ কৰে যে ১৯৭৬ চনৰ জৰুৰীকালীন অৱস্থাত ৪২ সংখ্যক সংবিধান সংশোধনী আইনৰ জৰিয়তে প্ৰস্তাৱনাত “সমাজবাদী”, “ধৰ্মনিৰপেক্ষ” আৰু ঐক্য” সংযোজিত কৰা হৈছিল, যি মূল সংবিধান খচৰা প্ৰস্তুত কৰা সময়ত সংযোজিত নাছিল।
তেওঁ স্পষ্টভাৱে কয় যে বিশ্বৰ অন্য কোনো গণতান্ত্ৰিক দেশৰ সংবিধানৰ প্ৰস্তাৱনাত এনে পৰিৱৰ্তন হোৱা নাই। লগতে তেওঁ উল্লেখ কৰে যে সংবিধান খচৰা প্ৰস্তুত প্ৰক্ৰিয়াত ড° বি.আৰ. আম্বেদকাৰে প্ৰস্তাৱনাক যথেষ্ট গুৰুত্ব দি কাম কৰিছিল। ধনখৰৰ এই বক্তব্য ৰাষ্ট্ৰীয় স্বয়ংসেৱক সংঘ (RSS)-ৰ শেহতীয়া আহ্বানৰ পটভূমিতে উল্লেখ কৰে, য’ত তেওঁলোকে “সমাজবাদী” আৰু “ধৰ্মনিৰপেক্ষ” শব্দদুটাৰ ভূমিকা পুনৰ মূল্যায়ন কৰিবলৈ আহ্বান জনাইছে। RSS ৰ যুক্তি অনুসৰি, এই শব্দবোৰ জৰুৰীকালীন সময়ত সংযোজন কৰা হৈছিল আৰু ড° আম্বেদকাৰৰ মূল দৃষ্টিভংগীৰ অংশ নহয়।
এই আহ্বানৰ পিছতে কংগ্ৰেছসহ বিভিন্ন বিৰোধী দলে তীব্ৰ সমালোচনা কৰিছে। তেওঁলোকে ইয়াক “ৰাজনৈতিক সুবিধাবাদ” বুলি অভিহিত কৰি দাবী কৰে যে এই পদক্ষেপ ভাৰতীয় সংবিধানৰ “মূল আত্মা”ৰ ওপৰত এক ধাৰণা প্ৰসূত আক্ৰমণ।
ইপিনে, RSS ৰ সাধাৰণ সম্পাদক দত্তত্ৰেয় হোছাবালেৰ বক্তব্যৰ সঁহাৰি জনাই, সংঘ-সম্পৰ্কীয় এখন মুখপত্ৰই স্পষ্ট কৰি দিছে যে সংগঠনৰ উদ্দেশ্য সংবিধান ভাঙি পেলোৱা নহয়, বৰঞ্চ “মূল ভাবনা আৰু অভিপ্ৰায়” পুনৰ স্থাপন কৰাহে। তেওঁলোকে ৪২ সংখ্যক সংশোধনীৰ মাধ্যমে প্ৰস্তাৱনাত সংযোজন হোৱা শব্দসমূহক কংগ্ৰেছ নেতৃত্বাধীন চৰকাৰৰ যুগৰ “বিকৃতি” হিচাপে অভিহিত কৰিছে।
এই বিতৰ্কৰ প্ৰেক্ষাপটত কেন্দ্ৰীয় মন্ত্ৰী জিতেন্দ্ৰ সিঙে RSS ৰ দৃষ্টিভংগীক সমৰ্থন জনাই কয় যে, বহু নাগৰিকে ইতিমধ্যে এই মন্তব্যৰ সৈতে একমত।
