অসমত অহা ১১ এপ্ৰিলত অনুষ্ঠিত হ’বলগীয়া লোকসভাৰ প্ৰথম পৰ্যায়ৰ ৫টা সমষ্টিৰ নিৰ্বাচনৰ বাবে মুঠ ৪৫ গৰাকী প্ৰাৰ্থীয়ে মনোনয়ন পত্ৰ দাখিল কৰিছে।
মুখ্য নিৰ্বাচনী বিষয়াৰ কাৰ্যালয়ৰ বিষয়াই সোমবাৰে এই কথা জানিবলৈ দি লগতে জনায় যে লখিমপুৰ সমষ্টিত সৰ্বাধিক সংখ্যক ১২গৰাকী প্ৰাৰ্থীয়ে মনোনয়ন পত্ৰ দাখিল কৰাৰ বিপৰীতে কলিয়াবৰ সমষ্টিত সৰ্বনিম্ন মাত্ৰ ৭গৰাকী প্ৰাৰ্থীয়েহে মনোনয়ন পত্ৰ দাখিল কৰে।
তেজপুৰত ১০গৰাকী প্ৰাৰ্থীয়ে মনোনয়ন পত্ৰ দাখিল কৰাৰ বিপৰীতে ডিব্ৰুগড় আৰু যোৰহাট সমষ্টিত দুয়োটাতে ৮গৰাকীকৈ প্ৰাৰ্থীয়ে মনোনয়ন পত্ৰ দাখিল কৰে।
সোমবাৰে প্ৰথম পৰ্যায়ৰ নিৰ্বাচন অনুষ্ঠিত হ’বলগীয়া সমষ্টিসমূহৰ বাবে মনোনয়ন পত্ৰ দাখিল অন্তিম দিন আছিল।
অসমত সৰ্বমুঠ ২,১৭,৬০,৬০৪ গৰাকী ভোটাৰে ভোটদান কৰিবলগীয়া লোকসভাৰ নিৰ্বাচনটোৰ প্ৰথম পৰ্যায়ত ৭৫,১৬,২৮৪গৰাকী ভোটাৰে ভোটদান কৰিব।
প্ৰথম পৰ্যায়ৰ নিৰ্বাচনৰ বাবে মনোনয়ন পত্ৰ দাখিল কৰা প্ৰাৰ্থীসকলৰ ভিতৰত অন্যতম হৈছে কলিয়াবৰত গৌৰৱ গগৈ(কংগ্ৰেছ), মণি মাধৱ মহন্ত (অগপ), তেজপুৰত প্ৰাক্তন আমোলা এমজিভিকে ভানু(কংগ্ৰেছ) আৰু মন্ত্ৰী পল্লৱ লোচন দাস(বিজেপি), যোৰহাটত মন্ত্ৰী তপন গগৈ (বিজেপি) আৰু সুশান্ত বৰগোঁহাই(কংগ্ৰেছ), ডিব্ৰুগড়ত প্ৰাক্তন কেন্দ্ৰীয় মন্ত্ৰী পৱন সিং ঘাটোৱাৰ(কংগ্ৰেছ) আৰু বৰ্তমানৰ সাংসদ ৰামেশ্বৰ তেলী(বিজেপি), লখিমপুৰত বৰ্তমানৰ সাংসদ প্ৰদান বৰুৱা(বিজেপি) আৰু অনিল বৰগোঁহাই(কংগ্ৰেছ)।
