শেহতীয়াকৈ ভুল বেজীৰ বাবে ৫ জন ৰোগীৰ মৃত্যু হোৱাৰ অভিযোগ উত্থাপন হৈছে। মঙলবাৰে নিশা ওড়িশাৰ কোৰাটপুৰৰ এখন চৰকাৰী চিকিৎসালয়ত সংঘটিত হয় এই চাঞ্চল্যকৰ ঘটনা। অৱশ্যে এই অভিযোগ অস্বীকাৰ কৰিছে চিকিৎসালয় কৰ্তৃপক্ষই।
চিকিৎসালয়ৰ সূত্ৰ অনুসৰি নিহত লোকসকল দক্ষিণ ওড়িশাৰ বিভিন্ন অঞ্চলৰ বাসিন্দা। ইয়াৰে তিনিজন আইচিইউত চিকিৎসাধীন হৈ আছিল। বাকীসকলক জেনেৰেল ৱাৰ্ডত ভৰ্তি কৰা হয়। মঙলবাৰে নিশা চিকিৎসালয়খনৰ নাৰ্চে তেওঁলোকক বেজী দিছিল। অভিযোগ অনুসৰি ইয়াৰ পাছতে ৫জন ৰোগীৰ মৃত্যু হয়। সমগ্ৰ ঘটনাক লৈ চিকিৎসালয় চৌহদত উত্তেজনা সৃষ্টি হয়। সেই নিশা মৃতকৰ পৰিয়ালৰ লোকে চিকিৎসালয়ত প্ৰতিবাদ সাব্যস্ত কৰে। এই তথ্য লাভ কৰাৰ পাছতে আৰক্ষীয়ে সেই স্থানত উপস্থিত হয়। তেওঁলোকৰ হস্তক্ষেপৰ বাবেই প্ৰতিবাদৰ সূত্ৰপাত হয়। ইতিমধ্যে মৃতদেহ দুটা মৰণোত্তৰ পৰীক্ষাৰ বাবে প্ৰেৰণ কৰা হৈছে। মৰণোত্তৰ পৰীক্ষাৰ প্ৰতিবেদন অহাৰ পাছতহে তেওঁলোকৰ মৃত্যুৰ প্ৰকৃত কাৰণ জানিব পৰা যাব।
সাংবাদিকৰ সৈতে হোৱা এক সাক্ষাৎকাৰত চিকিৎসালয়ৰ অধীক্ষক সুশান্ত কুমাৰ চাহুৱে কয় যে, “ৰোগীসকলৰ উচ্চ ৰক্তচাপ আছিল। তেওঁলোকৰ অৱস্থা ক্ৰমান্বয়ে অৱনতি ঘটিছিল। আমি তেওঁলোকক নিয়ম অনুসৰি বেজী দিছিলোঁ। কিন্তু বেজীয়ে কাম কৰা নাছিল যেন লাগে। সেইবাবেই তেওঁলোকৰ মৃত্যু হৈছিল।” তেওঁ লগতে কয়, “মৃতকৰ পৰিয়ালে যি অভিযোগ উত্থাপন কৰিছে সেয়া ভিত্তিহীন। অৱশ্যে আমি ইতিমধ্যে সমগ্ৰ ঘটনাৰ তদন্ত আৰম্ভ কৰিছো। মৃত্যুৰ প্ৰকৃত কাৰণ মৰণোত্তৰ পৰীক্ষাৰ প্ৰতিবেদন অহাৰ পাছতহে জানিব পৰা যাব।”
