দেশজুৰি পুনৰ ৫০০ টকীয়া নোটক লৈ এক খবৰ বিয়পি পৰিছে। ছচিয়েল মিডিয়াত ভাইৰেল হোৱা কেইবাটাও পোষ্ট আৰু ভিডিঅ’ত দাবী কৰা হৈছে যে চলিত বৰ্ষৰ মাৰ্চ মাহৰ পৰাই এটিএমত আৰু ৫০০ টকীয়া নোট উপলব্ধ নহ’ব। আনকি ভাৰতীয় ৰিজাৰ্ভ বেংকে এই মূল্যৰ নোট ছপা কৰাটোও বন্ধ কৰাৰ সিদ্ধান্ত লৈছে বুলি প্ৰচাৰ চলোৱা হৈছে। এই খবৰে স্বাভাৱিকতে সাধাৰণ ৰাইজৰ মাজত এক আতংকৰ সৃষ্টি কৰিছে।
অৱশ্যে এই উৰাবাতৰিৰ বিৰুদ্ধে এতিয়া কেন্দ্ৰীয় তথ্য আৰু সম্প্ৰচাৰ মন্ত্ৰালয়ে পোনপটীয়া স্থিতি গ্ৰহণ কৰিছে। চৰকাৰী তথ্য সংস্থা প্ৰেছ ইনফৰমেচন ব্যুৰো চমুকৈ পিআইবিয়ে এই সন্দৰ্ভত এক স্পষ্ট বিবৃতি প্ৰদান কৰিছে।
শুকুৰবাৰে পিআইবিয়ে জনাইছে যে ছচিয়েল মিডিয়াত বিয়পি পৰা এই দাবীসমূহ সম্পূৰ্ণ ভিত্তিহীন আৰু মিছা। দেশৰ শীৰ্ষ বেংক আৰবিআইৰ তৰফৰ পৰা এনে কোনো নিৰ্দেশনা বা ঘোষণা জাৰি কৰা হোৱা নাই।
পিআইবিয়ে তেওঁলোকৰ এক্স হেণ্ডেলৰ জৰিয়তে স্পষ্ট কৰি দিছে যে ২০২৬ চনৰ মাৰ্চ মাহৰ ভিতৰত ৫০০ টকীয়া নোট ছপা বন্ধ কৰাৰ যি খবৰ বিয়পিছে সেয়া সম্পূৰ্ণ ভুৱা। চৰকাৰীভাৱে জনোৱা হৈছে যে ৫০০ টকীয়া নোট এতিয়াও সম্পূৰ্ণৰূপে বৈধ আৰু নাগৰিকসকলে আগৰ দৰেই এই নোটৰ জৰিয়তে লেনদেন অব্যাহত ৰাখিব পাৰিব। ইয়াৰ উপৰিও চৰকাৰে সাধাৰণ ৰাইজক এনে ধৰণৰ উৰাবাতৰিত গুৰুত্ব নিদিবলৈ সতৰ্ক কৰি দিছে। যিকোনো বিত্তীয় তথ্য বিশ্বাস কৰাৰ আগতে সেয়া চৰকাৰী উৎসৰ পৰা পৰীক্ষা কৰি লবলৈও আহ্বান জনোৱা হৈছে।
উল্লেখযোগ্য যে ৫০০ টকীয়া নোট বাতিলক লৈ এনে উৰাবাতৰি এয়াই প্ৰথম নহয়। ২০১৬ চনৰ নোটবন্দীৰ পিছৰে পৰা সময়ে সময়ে এনেধৰণৰ মিছা খবৰ প্ৰচাৰ হৈ আহিছে। ইয়াৰ পূৰ্বে যোৱা আগষ্ট মাহত কেন্দ্ৰীয় মন্ত্ৰী পংকজ চৌধুৰীয়েও সংসদত স্পষ্ট কৰি দিছিল যে চৰকাৰৰ এনে কোনো পৰিকল্পনা নাই। এটিএমসমূহত ১০০ আৰু ২০০ টকীয়া নোটৰ সমান্তৰালভাৱে ৫০০ টকীয়া নোটৰ যোগান পূৰ্বৰ দৰেই অব্যাহত থাকিব। গতিকে বৰ্তমান এই নোটক লৈ কোনো ধৰণৰ পৰিৱৰ্তনৰ সিদ্ধান্ত লোৱা হোৱা নাই আৰু ৰাইজক আতংকিত নহ’বলৈ প্ৰশাসনে অনুৰোধ জনাইছে।
