দলৰ পৰিচিত ৰাজনৈতিক কৌশল অৱলম্বনেৰে আজি বিজেপিয়ে নিৰ্বাচন অভিমুখী মেঘালয়ত নিৰ্বাচনী প্ৰচাৰ অভিযান আৰম্ভ কৰিলে। আজি ৰাজ্যখনত দলৰ ৰাষ্ট্ৰীয় সভাপতি অমিত শ্বাহে এখন জনসভাত অংশ গ্ৰহণ কৰি ৰাজ্যখনৰ উন্নয়নৰ বাবে কেন্দ্ৰই কৰা চেষ্টাত শাসনাধিষ্ঠিত কংগ্ৰেছ চৰকাৰখন সহযোগিতা নকৰাৰ অভিযোগ তোলে। গুজৰাটৰ নিৰ্বাচনৰ দলীয় প্ৰচাৰ সভাত প্ৰধান মন্ত্ৰী মোদীয়ে ৰাজ্যখনৰ মুখ্য মন্ত্ৰী হৈ থকা সময়ত তেওঁক কেন্দ্ৰই সহযোগিতা নকৰাৰ অভিযোগ তোলাৰ দৰে ইয়াত ৰাজ্য খনৰ উন্নয়নৰ বাবে ৰাজ্য চৰকাৰখনে কেন্দ্ৰক সহযোগিতা নকৰাৰ অভিযোগ উত্থাপন কৰি প্ৰায় একে কৌশল অৱলম্বন কৰিলে অমিত শ্বাহে। নিজৰ ভাষণত অমিত শ্বাহে কয় যে কেন্দ্ৰত বিজেপিৰ চৰকাৰ আহিবৰ পৰা উত্তৰ-পূবৰ ৰাজ্যকেইখনৰ উন্নয়তে সৰ্বাধিক গুৰুত্ব দিছে। তেওঁ তথ্য দাঙি ধৰি কয় যে কেৱল মেঘালয়তে ৩১০০০ কোটি টকাৰ বেছি বিনিয়োগ কৰা হৈছে, যাৰ মাজৰ ৫৩০০ কোটি টকা কেৱল পথ যোগাযোগতে খৰচ কৰা হৈছে।
নিজৰ ভাষণৰ মাজতে অভিযোগ কৰি কয় যে মুকুল চাংমা নেতৃত্বাধীন কংগ্ৰেছ চৰকাৰখনে কেন্দ্ৰক সহযোগিতা নকৰা বাবে প্ৰধান মন্ত্ৰীয়ে লোৱা আঁচনিবোৰৰ সুফল ৰাজ্যখনে লাভ কৰা নাই।
পশ্চিম গাৰো পাহাৰৰ তিক্ৰিকিল্লাত অনুষ্ঠিত বিশাল জনসভাখনত বিজেপি দলৰ ৰাষ্ট্ৰীয় সভাপতিজনে কংগ্ৰেছ দলে ৰাজ্যখনৰ বিভিন্ন ক্ষেত্ৰত উন্নয়ন কৰাত ব্যৰ্থ হৈছে বুলিও অভিযোগ কৰে। তেওঁ মেঘালয়ৰ জনসাধাৰণক এখন বিকল্প চৰকাৰ গঠন কৰিবলৈ আহ্বান জনায়, যিখন চৰকাৰে প্ৰধান মন্ত্ৰী নৰেন্দ্ৰ মোদীক তেওঁৰ আঁচনিবোৰ ৰাজ্যখনৰ বাবে ৰূপায়ণ কৰাত সহায় কৰিব পাৰে।
তেওঁ দুৰ্নীতিৰ অভিযোগো উত্থাপন কৰে ৰাজ্য চৰকাৰখনৰ বিৰুদ্ধে আৰু এই প্ৰতিশ্ৰুতি দিয়ে যে বিজেপি শাসনলৈ আহিলে দুৰ্নীতি সমূলঞ্চে নিশ্ছিহ্ন কৰিব। আগন্তুক নিৰ্বাচনৰ পিছত বিজেপিয়ে মেঘালয়ত চৰকাৰ গঠন কৰিবলৈ সক্ষম হ’ব বুলিও দৃঢ়তাৰে কয় শ্বাহে।
