ৰাম মন্দিৰৰ চান্দা চুৰি আৰু দুৰ্নীতিৰ অভিযোগ পোহৰলৈ অহাৰ পিছত এইবাৰ প্ৰশাসনিক কাম-কাজ সুচাৰুৰূপে পৰিচালনা কৰিবলৈ শ্ৰী ৰাম জন্মভূমি তীৰ্থ ক্ষেত্ৰ ট্ৰাষ্টে স্থায়ীভাৱে মুখ্য কাৰ্যবাহী বিষয়া বা চি ই অ‘ নিযুক্তি দিয়াৰ দিশে আগবাঢ়িছে। এই পদৰ বাবে জমা পৰা পাঁচ হাজাৰ তিনিশৰো অধিক আবেদনৰ মাজৰ পৰা প্ৰাথমিক বাছনি কৰি ১৮ জন প্ৰাৰ্থীক সাক্ষাৎকাৰৰ বাবে মাতি পঠিওৱা হৈছে। মন্দিৰৰ চৌহদতে আগন্তুক দুদিন ধৰি এই সাক্ষাৎকাৰ পৰ্ব চলিব।
মন্দিৰৰ সূত্ৰই প্ৰকাশ কৰা অনুসৰি, চি ই অ‘ পদৰ সাক্ষাৎকাৰ ল‘বলৈ এখন উচ্চ পৰ্যায়ৰ সমিতি গঠন কৰা হৈছে। এই সমিতিত আছে অৱসৰপ্ৰাপ্ত ন্যায়াধীশ প্ৰমোদ কোহলী, লেফটেনেণ্ট জেনেৰেল (অৱসৰপ্ৰাপ্ত) বিষ্ণুকান্ত চতুৰ্বেদী আৰু শিৰডী ছাঁই বাবা ট্ৰাষ্টৰ প্ৰাক্তন অধ্যক্ষ তথা বিজ্ঞানী সুৰেশ হাৱৰে। ট্ৰাষ্টৰ সূত্ৰই জনোৱা মতে, প্ৰশাসনিক ক্ষেত্ৰত অভিজ্ঞতা থকা প্ৰাৰ্থীসকলক এই পদৰ বাবে অধিক গুৰুত্ব প্ৰদান কৰা হ‘ব।
অৱশ্যে চি ই অ‘ পদৰ বাবে ট্ৰাষ্টৰ তৰফৰ পৰা কিছুমান কঠোৰ নিয়ম বা চৰ্ত বান্ধি দিয়া হৈছে। নিৰ্বাচিত প্ৰাৰ্থীজন নিশ্চিতভাৱে এগৰাকী সনাতনী হিন্দু হ‘ব লাগিব আৰু তেওঁ হিন্দু পৰম্পৰা আৰু নীতি-নিৰ্দেশনাসমূহ কঠোৰভাৱে মানি চলিব লাগিব। ইয়াৰ উপৰিও প্ৰাৰ্থীজন সম্পূৰ্ণৰূপে নিৰামিষভোজী আৰু ৰাগিয়াল দ্ৰব্য সেৱনৰ পৰা বিৰত থকা হ‘ব লাগিব। প্ৰাৰ্থীৰ বয়স ৫০ ৰ পৰা ৭০ বছৰৰ ভিতৰত হোৱাটো বাধ্যতামূলক।
উল্লেখ্য যে, চলিত বৰ্ষৰ জুন মাহৰ প্ৰথম সপ্তাহত ৰাম মন্দিৰৰ চান্দা বা ধন আত্মসাৎ কৰাৰ ঘটনা পোহৰলৈ অহাৰ লগে লগে ট্ৰাষ্টৰ তৰফৰ পৰা এগৰাকী পূৰ্ণকালীন চি ই অ‘ নিযুক্তি দিয়াৰ সিদ্ধান্ত লোৱা হয়। ইয়াৰ পিছতে উত্তৰ প্ৰদেশ চৰকাৰে যোৱা ১৩ জুনত এই ঘটনাৰ তদন্তৰ বাবে এটা বিশেষ তদন্তকাৰী দল বা এছ আই টি গঠন কৰে। প্ৰাথমিক তদন্তৰ প্ৰতিবেদনৰ ভিত্তিত যোৱা ২৫ জুনত এজাহাৰ দাখিল কৰা হয় আৰু আৰক্ষীয়ে অবিনাশ শুক্লা, অনুকল্প মিশ্ৰ, লৱকুশ মিশ্ৰ, মনীষ কুমাৰ যাদৱ, কৰুণেশ পাণ্ডে, ৰমাশংকৰ মিশ্ৰ, সুভাষ শ্ৰীবাস্তৱ আৰু ৰমাশংকৰ যাদৱ ওৰফে টিনু যাদৱ নামৰ আঠজন অভিযুক্তক গ্ৰেপ্তাৰ কৰে।
তদন্তৰ সময়ত আৰক্ষীয়ে ধৃত লোকসকলৰ পৰা বৃহৎ পৰিমাণৰ নগদ ধন উদ্ধাৰ কৰিবলৈ সক্ষম হয়। ইয়াৰ ভিতৰত কেৱল অবিনাশ শুক্লাৰ পৰাই সৰ্বাধিক ২০ লাখ ৩৯ হাজাৰ টকা উদ্ধাৰ কৰা হৈছিল। ইয়াৰ লগতে সোণ, ৰূপ আৰু বিদেশী মুদ্ৰাও জব্দ কৰা হয়। চান্দা আত্মসাৎ কৰাৰ এই তদন্তৰ মাজতেই মন্দিৰৰ প্ৰশাসনিক আৰু ব্যৱসায়িক দিশসমূহ চোৱাচিতা কৰাৰ বাবে চি ই অ‘ নিযুক্তিৰ প্ৰক্ৰিয়া এতিয়া একেবাৰে চূড়ান্ত পৰ্যায়ত উপনীত হৈছেহি।
