মাজত আৰু কেইটামান দিন, ওচৰ চাপি আহিছে পোহৰৰ উৎসৱ দেৱালী। দেৱালীৰ প্ৰতি লক্ষ্য ৰাখি আতচবাজী প্ৰস্তুত কৰাত নামি পৰিছে আতচবাজী নিৰ্মাতাসকল। পিছে দেৱালী উপলক্ষে এই প্ৰস্তুতিৰ সময়তে বুধবাৰে হাৰিয়ানাত সংঘটিত হয় এক ভয়াৱহ বিস্ফোৰণৰ ঘটনা।
হাৰিয়ানাৰ গুৰুগ্ৰাম জিলাৰ নাখৰোলা নামৰ এখন গাঁৱত দেৱালীৰ বাবে সাজু কৰা আতচবাজী গোটাই ৰখা এটা গুদামঘৰত আতচবাজীৰ আকস্মিক বিস্ফোৰণৰ ফলত দুই শিশুসহ ছয়গৰাকী লোক গুৰুতৰভাৱে আঘাতপ্ৰাপ্ত হৈছে।
ঘটনা সন্দৰ্ভত আৰক্ষীৰ ভাষ্য মতে, পৰিয়ালটোৱে আগন্তুক দেৱালীৰ বাবে আতচবাজী তৈয়াৰ কৰি ঘৰৰ এটা কোঠাত গোটাই ৰাখিছিল। কিন্তু কোঠাত থকা আতচবাজীৰ হঠাতে বিস্ফোৰণ হয়।
এই বিস্ফোৰণৰ প্ৰকোপ ইমানেই তীব্ৰ আছিল যে ঘৰৰ চাল খহি পৰে। ইয়াৰ ফলত সেই সময়ত ঘৰৰ ভিতৰত উপস্থিত থকা ছয়গৰাকী লোক আহত হয়। আহতসকলৰ মাজতে দুগৰাকী ক্ৰমে ১০ বছৰীয়া আৰু ১১ বছৰীয়া শিশুও আছে বুলি আৰক্ষীয়ে জানিবলৈ দিছে।
বিস্ফোৰণৰ পিছতে অগ্নি নিৰ্বাপক বাহিনী, আৰক্ষী তথা ফৰেনচিক দল ঘটনাস্থলীত উপস্থিত হয় আৰু আহতসকলক উদ্ধাৰ কৰি গুৰুগ্ৰাম অসামৰিক চিকিৎসালয়লৈ প্ৰেৰণ কৰে। কিন্তু আঘাত গুৰুতৰ হোৱাৰ বাবে আটাইকেইগৰাকীকে উন্নত চিকিৎসাৰ বাবে দিল্লীৰ চফদৰজং চিকিৎসালয়লৈ প্ৰেৰণ কৰা হয়।
আনহাতে ঘটনা সন্দৰ্ভত জিলাখনৰ এগৰাকী শীৰ্ষ আৰক্ষী বিষয়াই জানিবলৈ দিয়া মতে প্ৰাথমিক অনুসন্ধানত আতচবাজীৰ বিস্ফোৰণৰ বাবেই এই ঘটনা সংঘটিত হোৱা বুলি নিশ্চিত হৈছে। পৰিয়ালটোৱে কোনো আগতীয়া অনুমতি অবিহনে আতচবাজী তৈয়াৰ কৰিছিল বুলি বিষয়াগৰাকীয়ে জানিবলৈ দিছে।
অৱশ্যে ঘটনাটোত আন কোনো বিস্ফোৰক পদাৰ্থ জড়িত আছে নেকি, সেয়া জানিবলৈ ফৰেনচিক দলে প্ৰমাণ সংগ্ৰহ কৰি আছে বুলি মন্তব্য কৰি তেওঁ লগতে যদি এনে কোনো প্ৰমাণ পোৱা যায়, দোষীৰ বিৰুদ্ধে বিহীত আইনী ব্যৱস্থা গ্ৰহণ কৰা হ’ব বুলি নিশ্চিতি দিয়ে।
