পুনৰ মেঘালয়ৰ কয়লা খনিত আৱদ্ধ হৈ পৰিল অসমৰ ছজনকৈ শ্ৰমিক। মেঘালয়ৰ পূৱ জয়ন্তীয়া জিলাৰ কয়লা খনিটোত কয়লা খননত ব্যস্ত হৈ থকাৰ সময়তে শ্ৰমিক কেইজন খনিটোৰ ভিতৰত আৱদ্ধ হৈ পৰে।
ৰাজ্য খনৰ আমপ্লেমৰ চুটুংগাত থকা কয়লা খনিটোত অসমৰ শ্ৰমিক কেইজন আৱদ্ধ হৈ পৰাৰ খবৰ শিলচৰ আৰক্ষীয়ে টুইটাৰত প্ৰকাশ কৰাৰ পিছতে মেঘালয় আৰক্ষীয়ে শ্ৰমিক কেইজনক উদ্ধাৰৰ বাবে অভিযান আৰম্ভ কৰিছে বুলি মেঘালয় আৰক্ষীৰ এক সূত্ৰই প্ৰকাশ কৰিছে।
উল্লেখ্য চলিতবৰ্ষৰ ২১ মে’তো মেঘালয়ৰ পূব জয়ন্তীয়া পাহাৰৰ এটা কয়লা খনিত কাম কৰি থকাৰ সময়তে দুৰ্ঘটনাত পতিত হৈ অসমৰ ৬ জনকৈ শ্ৰমিকে কৰুণ মৃত্যুক সাৱটি লৈছিল।
পূব জয়ন্তীয়া পাহাৰৰ ৰিম্বাই গাঁওৰ এটা কয়লা খনিত খনন চলাই থকাৰ সময়তে শ্ৰমিক কেইজনে উঠি থকা মেছিনটোৰ এটা অংশ ভাঙি গৈছিল।
ফলত প্ৰায় ১৫০ ফুট তললৈ পৰি গৈছিল শ্ৰমিক কেইজন।
উদ্ধাৰকাৰীৰ দলে খনিটোৰ ভিতৰৰ পৰা ৬ জন শ্ৰমিকৰ মৃতদেহ উদ্ধাৰ কৰিবলৈ সক্ষম হৈছিল।
নিহত শ্ৰমিক কেইজন অসমৰ কৰিমগঞ্জ জিলাৰ আছিল।
উল্লেখ্য ২০১৮ চনৰ ৩১ ডিচেম্বৰৰ দিনা মেঘালয়ৰ পূব জয়ন্তীয়া জিলাৰ ছান অঞ্চলত সংঘটিত খনি দুৰ্টনাত ১৫ জন শ্ৰমিক আৱদ্ধ হৈ পৰিছিল।
লাইটেন নৈৰ পানীয়ে খনি ওুচাই পেলোৱাৰ ফলত ১৫ জন শ্ৰমিক আৱদ্ধ হৈ পৰিছিল যদিও ৫ জনে কিবাকৈ প্ৰাণৰক্ষা কৰিছিল।
বাকী ১০ জন শ্ৰমিকৰ উদ্ধাৰ অভিযান ব্যৰ্থ হৈছিল আৰু ২০১৯ চনৰ মাৰ্চ মাহত উদ্ধাৰ অভিযান বন্ধ কৰাৰ কথা ঘোষণা কৰা হৈছিল।
