চোৰাং দ্ৰব্য সৰবৰাহৰ সুচল পথত পৰিণত বিমানবন্দৰ! এইবাৰ মুম্বাই বিমানবন্দৰত জব্দ ৬১ কিলোগ্ৰাম সোণ
ক্ৰমাৎ চোৰাং সামগ্ৰী সৰবৰাহৰ এক সুচল পথ হৈ পৰিছে দেশৰ বিমানবন্দৰ সমূহ। বিগত কেইমাহমানত দেশৰ বিভিন্ন প্ৰান্তৰ বিমানবন্দৰ সমূহত ড্ৰাগছৰ পৰা আৰম্ভ কৰি বন্য জীৱ-জন্তু পৰ্যন্ত সৰবৰাহ অভাৱনীয় হাৰত ধৰা পৰাৰ পিছত বিমানবন্দৰক কেন্দ্ৰ চলি থকা অবৈধ সৰবৰাহৰ ৰমৰমীয়া বেহাৰ দিশ উন্মোচিত হৈছে।
এইবাৰ মুম্বাইৰ ছত্ৰপতি শিৱাজী মহাৰাজ আন্তঃৰাষ্ট্ৰীয় বিমানবন্দৰত শুল্ক বিভাগৰ হাতোৰাত ধৰা পৰিছে বৃহৎ পৰিমাণৰ সোণ। দুটা পৃথক অভিযানত বিমানবন্দৰটোত শুল্ক বিভাগে ৬১ কিলোগ্ৰাম সোণ জব্দ কৰিছে।
এই পৰিমাণ এটা দিনৰ হিচাপত মুম্বাইৰ বিমানবন্দৰত শুল্ক বিভাগে জব্দ কৰা সৰ্বাধিক মূল্যৰ চোৰাং সোণ। অভিযানকালত বিভাগে এই সোণখিনি সৰবৰাহত জড়িত থকাৰ অভিযোগত দুই মহিলাসহ সাতগৰাকী যাত্ৰীক গ্ৰেপ্তাৰ কৰিছে।
বিভাগীয় এগৰাকী বিষয়াই এক বিবৃতিত উল্লেখ কৰা মতে শুল্ক বিভাগে প্ৰথমে তাঞ্জানিয়াৰ পৰা অহা চাৰিগৰাকী যাত্ৰীৰ পৰা ৫৩ কিলোগ্ৰাম সোণ আৰু তাৰ পীছত ডুবাইৰ পৰা অহা আন তিনিগৰাকী যাত্ৰীৰ পৰা ৮ কিলোগ্ৰাম সোণ জব্দ কৰে।
বিবৃতিটোত লগতে প্ৰকাশ কৰা অনুসৰি তাঞ্জানিয়াৰ পৰা উভতি অহা চাৰিগৰাকী ভাৰতীয়ই ৫৩ কিলোগ্ৰাম সোণ কঢ়িয়াই আনিছিল। তেওঁলোকে ১ কিলোগ্ৰাম ওজনৰ টুকুৰাৰ ৰূপত চোৰাং সোণখিনি সৰবৰাহ কৰিছিল।
এই বৃহৎ পৰিমাণৰ সোণখিনি বিশেষভাৱে ডিজাইন কৰা কঁকালৰ বেল্টত লুকুৱাই ৰাখিছিল যাত্ৰী চাৰিগৰাকীয়ে। জব্দকৃত এই সোণখিনিৰ মূল্য প্ৰায় ২৮.১৭ কোটি টকা হ’ব বুলি অনুমান কৰা হৈছে।
আনহাতে দ্বিতীয়টো অভিযানত ডুবাইৰ পৰা অহা তিনিগৰাকী ব্যক্তিয়ে কঢ়িয়াই অনা ৮ কিলোগ্ৰাম ওজনৰ সোণ জব্দ কৰে বিভাগে। প্ৰায় ৩.৮৮ কোটি টকা মূল্যৰ এই সোণখিনি যাত্ৰীকেইগৰাকীয়ে পৰিধান কৰি অহা জিন্সৰ কঁকালত মমৰ ৰূপত লুকুৱাই ৰাখিছিল।
ডুবাইৰ পৰা অহা এই দলটোত দুগৰাকী মহিলাও আছিল। ইয়াৰে এগৰাকী মহিলা হুইলচেয়াৰত বহি আহিছিল বুলি বিভাগীয় বিষয়াগৰাকীয়ে উল্লেখ কৰিছে। ইতিমধ্যে দুয়োটা অভিযানৰ সময়ত গ্ৰেপ্তাৰ হোৱা সাতগৰাকী ব্যক্তিক ন্যায়িক জিম্মালৈ প্ৰেৰণ কৰা হৈছে।