ভাৰতীয় নৌসেনাৰ এগৰাকী ২৫ বৰ্ষীয় বিষয়াৰ আত্মহত্যা কাণ্ডই চাঞ্চল্যৰ সৃষ্টি কৰিছে মুম্বাইত। মুম্বাই বন্দৰত এখন জাহাজত নিজ চাৰ্ভিচ পিষ্টলেৰে গুলীয়াই আত্হত্যা কৰিছে নৌসেনাৰ বিষয়াগৰাকীয়ে।
মৃত বিষয়াগৰাকীক হেপ্পী সিং তোমৰ বুলি চিনাক্ত কৰা হৈছে। কাৰিকৰী বিভাগৰ বিষয়াগৰাকী আইএনএছ চেন্নাই নামৰ এখন আগশাৰীৰ যুদ্ধ জাহাজত কৰ্মৰত আছিল।
হেপ্পী সিঙে তেওঁৰ পত্নীৰ সৈতে বিভাগীয় চৰকাৰী কোৱাৰ্টাৰত বাস কৰিছিল। ইফালে বিষয়াগৰাকীৰ আত্মহত্যা সন্দৰ্ভত কোলাবা আৰক্ষীয়ে এটা দুৰ্ঘটনাজনিত মৃত্যুৰ গোচৰ পঞ্জীয়ন কৰিছে।
স্থানীয় এগৰাকী আৰক্ষী বিষয়াই সদৰী কৰা মতে ঘটনাৰ খবৰ লাভ কৰাৰ পিছতে আৰক্ষী ঘটনাস্থলীত উপস্থিত হয় আৰু মৰণোত্তৰ পৰীক্ষাৰ বাবে মৃতদেহটো কাষৰীয়া জেজে চিকিৎসালয়লৈ প্ৰেৰণ কৰে।
আৰক্ষী বিষয়াগৰাকীয়ে লগতে উল্লেখ কৰা মতে প্ৰাথমিক তদন্তত এইয়া আত্মহত্যাৰ ঘটনা বুলি প্ৰায় নিশ্চিত হৈছে। হেপ্পী সিঙক তেওঁৰ সহকৰ্মীসকলে মৃত অৱস্থাত জাহাজৰ ভিতৰত উদ্ধাৰ কৰিছিল।
মৃত বিষয়াগৰাকীয়ে কোনো চুইচাইড নোট এৰি যোৱা নাই যদিও তেওঁ কোনো সমস্যাৰ সন্মুখীন হৈছিল নেকি পৰীক্ষা কৰিবলৈ তেওঁৰ মোবাইল ফোন স্কেন কৰা হৈছে।
আনহাতে আনুষ্ঠানিকতা সম্পূৰ্ণ হোৱাৰ পিছত মৃত বিষয়াগৰাকীৰ পৰিয়ালক মৃতদেহটো হস্তান্তৰ কৰা হ’ব বুলি আৰক্ষী বিষয়াগৰাকীয়ে লগতে জানিবলৈ দিছে।
