কৰ’না সংকট আৰু লকডাউনৰ ফলত বহু লোকে জীৱন-জীৱিকাক লৈ অস্থিৰতাত ভোগাৰ কথা সৰ্বজনবিদিত। কৰ’না পৰিস্থিতিত বহু লোকে চাকৰি হেৰুৱাব লগীয়াত পৰিছে।
এনে এক সময়তে গুজৰাটৰ বনছকন্ঠা জিলাৰ নবলাবেন নামৰ এগৰাকী মহিলাই এক প্ৰকাৰ অভিলেখ গঢ়িছে।
৬২ বছৰীয়া মহিলাগৰাকীয়ে পশুপালন আৰু গাখীৰ বিক্ৰী কৰি গঢ়িছে এই অভিলেখ। ২০২০ বৰ্ষত তেওঁ প্ৰায় ১ কোটি ১০লাখ টকাৰ গাখীৰ বিক্ৰী কৰিছে।
ৰাজ্যখনৰ বনছকন্ঠা অঞ্চলত মহিলাগৰাকীৰ সুনাম বিয়পি পৰিছে। কম খৰচতে পশুপালন কৰিছে নবলাবেনে।
বৰ্তমান তেওঁৰ ৮০টা ম’হ আৰু ৪৫টা গৰু আছে। প্ৰতিদিন তেওঁ ইয়াৰ পৰা ১হাজাৰ লিটাৰ গাখীৰ লাভ কৰে।
বাতৰি অনুসৰি, মহিলাগৰাকীয়ে প্ৰতি মাহে গাখীৰ বিক্ৰী কৰি ৩লাখ ৫০হাজাৰ টকা উপাৰ্জন কৰে। গাওঁত তেওঁৰ নিজৰ ডেইৰী আছে। তেওঁৰ ১১জন কৰ্মচাৰীও আছে।
মহিলাগৰাকী চাৰি সন্তানৰ মাতৃ। ২০১৯বৰ্,ত মহিলাগৰাকীয়ে ৮৭.৯৫লাখ টকাৰ গাখীৰ বিক্ৰী কৰিছিল।
আত্মনিৰ্ভৰ মহিলাগৰাকীৰ এনে কৰ্মৰ বাবে সৰ্বত্ৰ প্ৰশংসিত হৈছে। তেওঁ ইতিমধ্যে কেইবাটাও পুৰষ্কাৰো লাভ কৰিছে।
