সমগ্ৰ দেশতে ৬৪সংখ্যক বন্যপ্ৰাণী সপ্তাহ উদযাপনৰ কাৰ্য্যসূচীৰ সৈতে সামঞ্জস্য ৰাখি ৰাজ্য চৰকাৰেও এই সপ্তাহ পালন কৰিবলৈ গৈ দিৱসটোৰ তাৰিখ সম্পৰ্কীয় যি বিভ্ৰান্তিৰ সৃষ্টি কৰিছিল তাৰ আজি শুধৰনি কৰিছে চৰকাৰে।
পূৰ্বে ৬৪ সংখ্যক বন্যপ্ৰাণী সপ্তাহ ১ৰ পৰা ৭ অক্তোবৰলৈকে পালন কৰিব বুলি কাকতৰ সম্পূৰ্ণ পৃষ্ঠা ভৰাই বিজ্ঞাপন দিয়া ৰাজ্য চৰকাৰে আজি এই সপ্তাহ ২ৰ পৰা ৮ অক্তোবৰলৈ বুলি চৰকাৰে নিজৰ অনলাইন মাধ্যমবোৰত শুধৰাই প্ৰকাশ কৰিছে।
উল্লেখযোগ্য যে ৰাজ্যখনৰ প্ৰধান দৈনিক বাতৰি কাকতসমূহত যোৱা সোমবাৰেই (১ অক্টোবৰ, ২০০৮) সম্পূৰ্ণ এক পৃষ্ঠাৰ বিজ্ঞাপন দিছিল ৰাজ্য চৰকাৰৰ জনসংযোগ বিভাগ, য’ত মিচিকিয়াই হাঁহি থকা মুখ্য মন্ত্ৰী সৰ্বানন্দ সোণোৱালৰ লগতে অসম গৌৰৱ এশিঙীয়া গঁড় তথা অন্য বন্যপ্ৰাণীৰ ফটোসহ বন্যপ্ৰাণী সপ্তাহ ১ অক্টোবৰৰ পৰা ৭ অক্টোবৰলৈ বুলি প্ৰকাশ পাইছিল। বিজ্ঞাপনটো তথ্য আৰু জনসংযোগ সঞ্চালকালয়ে বিজ্ঞাপন নং জনসংযোগ/ ডি/ ৫৩১৫/ ১৮ যোগে কাকতসমূহত প্ৰকাশ কৰিছিল।
ইয়াৰ পিছতে চৰকাৰৰ এই প্ৰমাদক লৈ প্ৰতিক্ৰিয়াৰ সৃষ্টি হয়। ৰাজ্য চৰকাৰৰ মিডিয়া মেনেজমেন্ট বিষয়ৰ দায়িত্বত থকা লোকসকলৰ জ্ঞান-দায়বদ্ধতাক লৈও প্ৰশ্ন তোলে বিভিন্নজনে।
