ছট্টিশগড়ত সংঘটিত হৈছে এক শোকাৱহ ঘটনা।
ৰাজ্য খনৰ বিলাসপুৰ গাঁৱৰ সাত জনকৈ লোকে মদ নপাই নিচা লগাবলৈ এবিধ বিশেষ হোমিঅ’পেথি দৰৱ পান কৰি কৰুণ মৃত্যুক সাৱটি লৈছে।
গাঁও খনৰে আন পাঁচ জন লোক হোমিঅ’পেথি দৰৱ খাই গুৰুতৰ ভাবে অসুস্থ হৈ পৰিছে।জানিব পৰা মতে আজি পুৱাৰ ভাগত বিলাসপুৰ গাঁৱৰ চাৰিজন লোকৰ নিজৰ ঘৰতে মৃত্যু ঘটে।
পৰিয়ালৰ লোকে লোক কেইজনৰ ক’ৰ’নাত মৃত্যু হোৱা বুলি সন্দেহ কৰি ততাতৈয়াকৈ মৃতদেহ সৎকাৰৰ ব্যৱস্থা কৰে। এনে সময়তে আন তিনি জন লোকৰো চিকিৎসালয়ত মৃত্যু ঘটে।
ঘটনাটোৱে চাঞ্চল্যৰ সৃষ্টি কৰাৰ সময়তে কোনো লোকে আৰক্ষীক খবৰ দিয়ে।
আৰক্ষীয়ে গাঁও খনত উপস্থিত হৈ তদন্ত আৰম্ভ কৰে আৰু মৃত লোক কেইজনে এখন স্থানীয় হোমিঅ’ ফাৰ্মাচীৰ পৰা এবিধ বিশেষ চিৰাপ ক্ৰয় কৰি নিচা লগাবলৈ পান কৰা বুলি জানিব পাৰে।
লোক কেইজনে পান কৰা হোমিঅ’ চিৰাপ বিধত ৯১ শতাংশ এলকোহল থকা বুলি আৰক্ষীয়ে প্ৰকাশ কৰিছে।
ইপিনে একেবিধ হোমিঅ’ চিৰাপ পান কৰা আন পাঁচ জন লোকেও নিচা লগাবলৈ দৰৱ বিধ খাইছিল বুলি প্ৰকাশ কৰিছে।
লোক কেইজনে হোমিঅ’ দৰৱ বিধ খোৱাৰ বাবেই মৃত্যুক সাৱটি ল’লে নে আন কোনো কাৰণত তেওঁলোকৰ মৃত্যু হৈছে সেয়া অধিক তদন্তৰ পিছতহে স্পষ্ট হ’ব বুলি আৰক্ষীয়ে প্ৰকাশ কৰিছে।
কিন্তু একেবিধ দৰৱ পান কৰাৰ পিছতে বহু কেইজন লোক অসুস্থ হৈ পৰা আৰু ৭ জনকৈ লোকৰ মৃত্যু ঘটাৰ কথাই দৰৱ বিধ পান কৰাৰ বাবেই এনে হ’বলৈ পালে বুলি বহুতে সন্দেহ কৰিছে।
উল্লেখ্য ইয়াৰ পূৰ্বেও দেশৰ বহু ঠাইত নিচা লগাবলৈ ছেনিটাইজাৰ পান কৰি বহু লোকৰ মৃত্যু ঘটিছে।
