শুকুৰবাৰে পুৱতি নিশা কৰ্ণাটকৰ কমলাপুৰা চহৰৰত সংঘটিত এক পথ দুৰ্ঘটনাত এখন ব্যক্তিগত বাছত জুই লগাৰ ফলত বাছত থকা ৭ জন ব্যক্তি অগ্নিদগ্ধ হৈ মৃত্যুক সাবটি লয়।
বিপৰীত দিশৰ পৰা আহি থকা এখন টেম্পো ট্ৰেক্সৰ সৈতে মুখামুখি সংঘৰ্ষৰ পিছত বাছখনত জুই লাগে আৰু মুহূৰ্ততে এই জুইয়ে গোটেই বাছখন আৱৰি ধৰে।
গোৱাৰ পৰা হায়দৰাবাদ অভিমুখী বাছখনত মুঠ ২৯ জন যাত্ৰী আছিল বুলি জানিব পৰা গৈছে।
আৰক্ষীয়ে জানিবলৈ দিয়া মতে জুইৰ ফলত সম্পূৰ্ণৰূপে বাছখন জ্বলি যোৱাৰ পিছত ভিতৰত থকা ২২ জন যাত্ৰীয়ে কোনোমতে বাছৰ পৰা ওলাই প্ৰাণ ৰক্ষা কৰিবলৈ সক্ষম হয়।
কিন্তু আন সাতজনৰ শৰীৰত ব্যাপকভাৱে অগ্নিসংযোগ হোৱাৰ ফলত ব্যক্তিকেইজনৰ মৃত্যু হয়।
আনহাতে দুৰ্ঘটনাটোত টেম্পো ট্ৰেক্সৰ চালকজনো গুৰুতৰভাৱে আঘাতপ্ৰাপ্ত হৈছে বুলি জানিব পৰা গৈছে।
দুৰ্ঘটনাৰ পিছতে আহতসকলক কালাবুৰাগীৰ বিভিন্ন চিকিৎসালয়লৈ স্থানান্তৰিত কৰা হয়। সামান্য আঘাতপ্ৰাপ্ত কেইজনমান লোকক মুকলি কৰি দিয়া হৈছে যদিও কেইবাজনো চিকিৎসাধীন হৈ আছে বুলি আৰক্ষীৰ সূত্ৰই প্ৰকাশ কৰিছে।
