সমগ্ৰ দেশৰ লগতে বৃহস্পতিবাৰে শিৱসাগৰতো উলহ মালহেৰে পালন কৰা হয় ৭৩ সংখ্যক স্বাধীনতা দিৱস।
এই উপলক্ষে জিলা প্ৰশাসনৰ উদ্যোগত নগৰৰ বৰ্ডিং খেল পথাৰত আয়োজন কৰা হয় স্বাধীনতা দিৱসৰ কাৰ্যসূচী।
পতাকা উত্তোলন কৰে অসম চৰকাৰৰ পৰ্যটন, ভৈয়াম জনজাতি অন্যান্য পিছপৰা শ্ৰেণীৰ কল্যাণ মন্ত্ৰী চন্দন ব্ৰহ্মই।
পতাকা উত্তোলনৰ পাছতেই আৰক্ষী, স্কাউট, গাইড আৰু গৃহৰক্ষী জোৱানৰ দ্বাৰা কুছ-কাৱাজ প্ৰদৰ্শন কৰা হয়।
তাৰ পাছত কণ কণ লৰা-ছোৱালীৰ মাজত বিভিন্নধৰণৰ খেল-ধেমালি অনুষ্ঠিত কৰা হয়।
জিলা প্ৰশাসনে কাৰাগাৰৰ কয়দী সকলৰ মাজত, শিৱসাগৰ জিলা অসামৰিক চিকিৎসালয়ত ৰোগী আৰু কৌমুদালয়ত ফলমূল বিতৰণ কৰে।
বিয়লি জিলা প্ৰশাসন আৰু শিৱসাগৰ জিলা প্ৰবীণ ক্ৰীড়াবিদ সকলৰ মাজত এখনি প্ৰীতি ফুটবল খেল অনুষ্ঠিত হয়।
শিৱসাগৰৰ দৰিকাপাৰ খাটপথাৰ গাঁৱৰ মুক্তিযোদ্ধা স্বৰ্গীয় কনক চন্দ্ৰ গগৈৰ সহধৰ্মিনী শ্ৰীমতী ভাগ্যলতা গগৈয়ে স্বামীৰ ত্যাগক সন্মান জনাই নিজ গৃহত পতাকা উত্তোলন কৰি স্বাধীনতা দিৱস পালন কৰে।
শিৱসাগৰ প্ৰেছ ক্লাৱতো পুৱা ক্লাৱৰ সভাপতি সৌমাৰ জ্যোতি মহন্ত, সম্পাদক ইনামূল হাজৰিকা তথা আন সাংবাদিকৰ উপস্থিতিত পতাকা উত্তোলন কৰা হয়।
ঐক্য সেনা শিৱসাগৰ জিলা সমিতিৰ মুখ্য কাৰ্যালয়তো স্বাধীনতা দিৱস উপলক্ষে শতাধিক সদস্য-সদস্যাৰ উপস্থিতিত পতাকা উত্তোলন কৰা হয়।
শিৱসাগৰ জিলা বিজেপি কাৰ্যালয়তো জিলা বিজেপিৰ সভানেত্ৰী সুৰভি ৰাজকুঁৱৰীয়ে পতাকা উত্তোলন কৰে।
শিৱসাগৰ জিলা কংগ্ৰেছ কমিটিয়েও ৰাজীৱ ভৱনত পতাকা উত্তোলন কাৰ্যসূচী ৰূপায়ণ কৰে।
ইফালে ‘হামৰাহী’ৰ উদ্যোগত নগৰৰ এ টি ৰোডস্থিত মিলন মন্দিৰত দিনজোৰা কাৰ্যসূচীৰে স্বাধীনতা দিৱস উদযাপন কৰা হয়।
বিভিন্ন সাংস্কৃতিক কাৰ্যসূচীৰে ‘হামৰাহী’ৰ উদ্যোগত কেইবা শতাধিক লোকে আনন্দ ফুৰ্তিৰে স্বাধীনতা দিৱস পালন কৰে।
আনহাতে, দেশৰ ৭৩ সংখ্যক স্বাধীনতা দিৱসত এক ব্যতিক্ৰমী কাৰ্যসূচী ৰূপায়ণ কৰে শিৱসাগৰৰ অন্যতম স্বেচ্ছাসেৱী সংগঠন ‘ৰেচকিউ’ৱে।
স্বাধীনতা দিৱসত ৭৩ গৰাকী ব্যক্তিয়ে ৰেচকিউৰ উদ্যোগত ৰক্ত দান কৰে।
নগৰৰ দ’লমুখ চাৰিআলিস্থিত জয়দয়াল খেমকা মাতৃ সদনত এই ৰক্তদান কাৰ্যসূচী দিনৰ ১১ বজাৰ পৰা বিয়লি ৪ বজালৈ চলে।
ৰক্তদাতা ৰাইজক উৎসাহিত কৰিবলৈ শিৱসাগৰ জিলা উপায়ুক্ত ডাঃ এচ লক্ষ্মণনে এই ৰক্তদান শিবিৰত ৰক্তদান কৰে।
শ্ৰীমন্ত শংকৰদেৱ সঙ্ঘ শিৱসাগৰ জিলা শাখাৰ শিশু আৰু আইমাতৃ কল্যাণ সমিতিৰ উদ্যোগত আৰু জিলা সেৱা বাহিনীৰ সহযোগত স্বাধীনতা দিৱস উপলক্ষে শিৱসাগৰ অসামৰিক চিকিৎসালয়ত ৰোগী সকলৰ মাজত পুষ্টিকৰ খাদ্য, ফলমূল আদি বিতৰণ কৰা হয়।
তদুপৰি, সকলো চৰকাৰী-বেচৰকাৰী কাৰ্যালয়, অনুষ্ঠান-প্ৰতিষ্ঠান, বিদ্যালয় মহাবিদ্যালয়, ব্যক্তিগত আবাসগৃহত আদিত পতাকা উত্তোলন কৰা হয়।
