পশ্চিম বংগত ৰাজনৈতিক হিংসা: বাসগৃহত অগ্নিসংযোগ; ৮ জনৰ মৃত্যু
পশ্চিম বংগত ভয়াৱহ ৰূপ ধাৰণ কৰিছে ৰাজনৈতিক হিংসাই। ৰাজ্যখনৰ বীৰভূমত আজি কেইবাটাও বাসগৃহত অগ্নি সংযোগ কৰাৰ ফলত আঠজনকৈ লোকৰ মৃত্যু হৈছে।
এজন ৰাজনৈতিক নেতাৰ হত্যাৰ প্ৰতিশোধ মৰ্মেই এই হিংসাত্মক পৰিস্থিতিৰ সৃষ্টি হৈছে বুলি অভিযোগ উত্থাপন হৈছে।
উল্লেখ্য সোমবাৰে বীৰভূমৰ ৰামপুৰহাটত দুৰ্বৃত্তৰ বোমা আক্ৰমণৰ ফলত তৃণমূল কংগ্ৰেছৰ পঞ্চায়ত নেতা ভাদু প্ৰধান নিহত হৈছিল।
এই হত্যাকাণ্ডৰ প্ৰতিশোধ স্বৰূপেই আজি অঞ্চলটোৰ কেইবাটাও ঘৰত জুই লগোৱা হয় বুলি সন্দেহ কৰা হৈছে।
ঘৰবোৰত অগ্নি সংযোগ কৰাৰ পূৰ্বে ঘৰৰ দুৱাৰবোৰ বাহিৰৰ পৰা বন্ধ কৰি দিয়া হৈছিল বুলি স্থানীয় ৰাইজে জানিবলৈ দিয়ে।
এই হিংসাত্মক ঘটনাৰ পিছত বৰ্তমানলৈকে আঠটা মৃতদেহ উদ্ধাৰ কৰা হৈছে। ইয়াৰে সাতটা মৃতদেহ একেটা ঘৰৰ পৰাই উদ্ধাৰ কৰা হৈছে বুলি সংবাদ মাধ্যমত প্ৰকাশ পাইছে।
ইতিমধ্যে এই ভয়াৱহ ঘটনাটোৰ প্ৰতি লক্ষ্য ৰাখি বংগ চৰকাৰে জ্যেষ্ঠ বিষয়া জ্ঞানৱন্ত সিং, মিৰাজ খালিদ আৰু সঞ্জয় সিঙক লৈ তিনিজনীয়া বিশেষ অনুসন্ধান দল গঠন কৰিছে।
আনহাতে ৰামপুৰহাট আৰক্ষী থানাৰ ভাৰপ্ৰাপ্ত বিষয়া আৰু উপ-বিভাগীয় আৰক্ষী বিষয়াক তাৎক্ষণিক ভাৱে নিলম্বন কৰা হৈছে।