জম্মু-কাশ্মীৰৰ কিষ্টৱাৰ জিলাত মঙ্গলবাৰে সংঘটিত হৈছে এক শোকাৱহ দুৰ্ঘটনা। এখন যাত্ৰীবাহী বাহন পথৰ কাষত থকা খাৱৈত বাগৰি পৰাৰ ফলত মৃত্যু ঘটিছে এগৰাকী কিশোৰীসহ আঠগৰাকী লোকৰ। লগতে দুৰ্ঘটনাটোত আহত হৈছে ৩ জন লোক।
ঘটনা সন্দৰ্ভত আৰক্ষীয়ে জানিবলৈ দিয়া মতে বাহনখন কিষ্টৱাৰ জিলাৰ চিঙ্গমৰ পৰা চাটৰু অভিমুখে গৈ আছিল আৰু বোন্দা গাঁৱৰ ওচৰত আবেলি প্ৰায় ৩.১৫ বজাত দুৰ্ঘটনাটো সংঘটিত হৈছিল।
এই ভয়াৱহ দুৰ্ঘটনাত ঘটনাস্থলীতে পাঁচজন লোকৰ মৃত্যু হোৱাৰ বিপৰীতে আন তিনিজনক চিকিৎসালয়লৈ নিয়াৰ সময়ত মৃত্যু হয়।
মৃত্যু হোৱা আটাইকেইগৰাকী যাত্ৰী বোন্দা গাঁৱৰ বাসিন্দা আছিল বুলি আৰক্ষী বিষয়াসকলে জানিবলৈ দিছে।
আনহাতে আহত তিনিগৰাকীক সংকটজনক অৱস্থাত চিকিৎসালয়ত ভৰ্তি কৰোৱা হয় বুলি স্থানীয় এগৰাকী আৰক্ষী বিষয়াই জানিবলৈ দিয়ে। কিষ্টৱাৰৰ উপায়ুক্তই দুৰ্ঘটনাটোত নিহত তথা আহত সকলক প্ৰয়োজনীয় ক্ষতিপূৰণ প্ৰদান কৰা হ’ব বুলি ঘোষণা কৰিছে।
আনহাতে চিকিৎসাধীন হৈ থকা ব্যক্তি তিনিগৰাকীৰ চিকিৎসাৰ ব্যয় বহন কৰা হ’ব বুলিও উপায়ুক্ত গৰাকীয়ে নিশ্চিত কৰিছে।