মঙলবাৰে অনুষ্ঠিত হৈ যোৱা প্ৰথম পৰ্যায়ৰ পঞ্চায়ত নিৰ্বাচনৰ ভোটগ্ৰহণ প্ৰক্ৰিয়া শিৱসাগৰ জিলাৰ তিনিওটা বিধানসভা সমষ্টি ক্ৰমে শিৱসাগৰ, থাওৰা আৰু আমগুৰিত সুকলমে অনুষ্ঠিত হৈ যায়।
জিলা তথ্য আৰু জনসংযোগ বিভাগে জানিবলৈ দিয়া মতে মুঠ ৬৩৮ টা ভোটগ্ৰহণ কেন্দ্ৰত ভোটদান অনুষ্ঠিত হৈছিল। আৰু এই ভোট কেন্দ্ৰ সমূহৰ পৰা পোৱা তথ্য অনুসৰি শিৱসাগৰ জিলাত ৮১.৪ শতাংশ ভোটদান সম্পন্ন হয়।
জনসংযোগ বিভাগে সদৰী কৰা অনুসৰি ১ নং ডিমৌ আঞ্চলিক পঞ্চায়তত ৮১%, ২ নং শিৱসাগৰ আঞ্চলিক পঞ্চায়তত ৭৯.৬%, ৩ নং গৌৰীসাগৰ আঞ্চলিক পঞ্চায়তত ৮২% আৰু ৪ নং আমগুৰি আঞ্চলিক পঞ্চায়তত ৮৩% ভোটদান সম্পন্ন হয়। দুই এক ভোট কেন্দ্ৰত বহুদেৰিলৈকে ভোট গ্ৰহণ প্ৰক্ৰিয়া চলিছিল বুলি জানিব পৰা গৈছে।
উল্লেখ্য যে জিলাখনত কেইটামান ভোটগ্ৰহণ কেন্দ্ৰত দুই এক বিক্ষিপ্ত ঘটনাই ভোটদান প্ৰক্ৰিয়াত কিছু বিশৃংখলতাৰ সৃষ্টি কৰিছিল যদিও জিলা প্ৰশাসনৰ তৎপৰতাত পুনৰ সেই কেন্দ্ৰসমূহত ভোটগ্ৰহণ প্ৰক্ৰিয়া সুকলমে চলাই নিবলৈ সক্ষম হয়।
