উত্তৰ-পূব ভাৰতৰ প্ৰধান কৃষি শস্য হৈছে ধান। কিন্তু খেৰনি জলোৱা অৰ্থাৎ ধানৰ অৱশিষ্ট জ্বলোৱাৰ ফলত হ্ৰাস পাব উৎপাদন। বুধবাৰে মণিপুৰৰ ইম্ফলত এই সম্বন্ধত আয়োজিত এখন কৰ্মশালাত কৃষি বিশেষজ্ঞই এইদৰে মন্তব্য কৰে।
লক্ষ্যণীয় যে উত্তৰ-পূবৰ মুঠ আঠখন ৰাজ্যত প্ৰায় ১০.৭ মেট্ৰিক টন ধান উৎপাদন হয়। বিশেষজ্ঞৰ মতে ২০১৫-১৬ বৰ্ষত ভাৰতৰ ভিতৰত উত্তৰ-পূবে ৬.৮৫ শতাংশ ধান উৎপন্ন কৰিছিল। এই আঠখন ৰাজ্যৰ ভিতৰত অসম,মণিপুৰ আৰু ত্ৰিপুৰাই ধান উৎপাদন ক্ষেত্ৰত উল্লেখনীয় ভূমিকা গ্ৰহণ কৰি আহিছে।
মেঘালয়ৰ উমিয়ামত অৱস্থিত ভাৰতীয় কৃষি গৱেষনা পৰিষদৰ উত্তৰ-পূব শাখাৰ ছয় জনীয়া এটা বিশেষজ্ঞৰ দলে ‘মেনেজমেণ্ট অৱ ৰাইচ ৰেচিডিউ ফ’ৰ চাচটেইনেব’ল চইল হেল্থ ইন কনজাৰভেশ্যন এগ্ৰিকালচাৰ’ শীৰ্ষক এখন পেপাৰ উপস্থাপন কৰে মণিপুৰত চলি থকা ধানৰ অৱশিষ্ট জ্বলোৱাৰ শীৰ্ষক এখন কৰ্মশালাৰ প্ৰথম দিনৰ কাৰ্যসূচীত।
বিশেষক্ষৰ দলটোৱে কয় যে ধানৰ অৱশিষ্ট অংশ জ্বলাই দিয়াৰ বাবে পৰৱৰ্তী উৎপাদনৰ সময়ত যথেষ্ট প্ৰভাৱ পৰে। তদুপৰি জ্বলাই দিয়াৰ ফলত পৰিৱেশৰ ওপৰতো ব্যাপক প্ৰভাৱ পৰা পৰিলক্ষিত হয়। ইফালে অৱশিষ্ট জ্বলোৱাৰ ফলত কৃষি শস্য নষ্ট কৰা বিভিন্ন পোক-পৰুৱাৰ বিনষ্ট হোৱাৰ উপৰি কৃষি কাৰ্য কৰাত সহায়ক হয়।
ধানৰ অৱশিষ্ট জলোৱাৰ পৰা কিদৰে পৰিত্ৰাণ পাব পাৰি বা এই সম্বন্ধত কিবা বিকল্প পথ উলিয়াব পাৰি নেকি সেই বিষয়ৰ লগতে অন্যান্য সকলোবোৰ কথা কৰ্মশালাখনত আলোচনা কৰা হয়। তদুপৰি ভৱিষৎ প্ৰজন্মৰ বাবে এখন সংৰক্ষিত তথা সেউজীয়া পৰিৱেশৰে আৱৰা সমাজ এখন যাতে থাকে তাৰ বাবে সকলো খেতিয়ককে উক্ত কাৰ্যৰ পৰা বিৰত থাকিবলৈ অনুৰোধ জনায়।
ইণ্ডিয়ান এচ’চিয়েশ্যন অৱ হীল ফাৰ্মিং, মেঘালয়ৰ সহযোগত ইণ্ডিয়ান কাউন্সিল অৱ এগ্ৰিকালচাৰেল ৰিচাৰ্ছ ফৰ এন ই ৰিজ’ন আৰু চেন্ট্ৰল এগ্ৰিকালচাৰেল ইউনিভাৰ্চিটি, ইম্ফলৰ তত্বাৱধানত এই কৰ্মশালাৰ আয়োজন কৰিছিল।
কৰ্মশালাখনত উপস্থিত থকা বিভিন্ন বক্তাৰ লগতে মণিপুৰৰ কৃষি মন্ত্ৰী ভি হাংখালিয়ানে নিজৰ ভাষনত কয় যে অৱশিষ্ট অংশ জ্বলাই দিয়াৰ বিৰীতে অন্য পদক্ষেপ গ্ৰহণ কৰাত জোৰ দিয়ে। ইয়াৰ উপৰি মন্ত্ৰীজনে এই ক্ষেত্ৰত চৰকাৰে শীঘ্ৰে ব্যৱস্থা গ্ৰহণ কৰাৰ কথাও উল্লেখ কৰে।
আনহাতে ৰাজ্যৰ সকলো খেতিয়কৰ মাজতে এই সম্বন্ধত সজাগতা সৃষ্টি কৰিব লাগিব বুলি কয়।
মণিপুৰ ইউনিভাৰ্চিটিৰ উপাচাৰ্য প্ৰফ আদিত্য প্ৰসাদ পাণ্ডেই কয় যে মণিপুৰত ধানৰ অৱশিষ্ট জ্বলোৱা এটা ডাঙৰ সমস্যা আৰু গভীৰ চিন্তনীয় বিষয়।
কৰ্মশালাখনত উপস্থিত থাকে অতিৰিক্ত প্ৰধান সচিব সুহেল আখতাৰ, আইচিএআৰ উত্তৰ-পূব শাখাৰ পৰিচালক এন প্ৰকাশ, মণিপুৰ ৰিজ’নেল অফিচ নাবাৰ্ডৰ জেনেৰেল মেনেজাৰ পিএন প্ৰবীন কুমাৰৰ লগতে বিভিন্ন ক্ষেত্ৰৰ লগত জড়িত বহুতো বিশিষ্ট ব্যক্তি উপস্থিত আছিল।
এই কৰ্মশালাখনতে উদ্যোক্তাই প্ৰস্তুত কৰি উলিওৱা এখন স্মাৰকগ্ৰন্থ উন্মোচন কৰে।
