নেশ্যনেল লিবাৰেশ্যন ফ্ৰণ্ট অব ত্ৰিপুৰা (এন এল এফ টি)ৰ ৮৮ গৰাকী বিদ্ৰোহী সদস্যই শুকুৰবাৰে মুখ্য মন্ত্ৰী বিপ্লৱ কুমাৰ দেৱৰ উপস্থিতিত অস্ত্ৰ সম্বৰণ কৰি মূল সুতিলৈ উভতি আহে।
চবিৰ কুমাৰ দেৱ বাৰ্মাৰ নেতৃত্বত এন এল এফ টি বিদ্ৰোহী সদস্যৰ দলটিয়ে ত্ৰিপুৰাৰ ঢালাই জিলাৰ আমবাছা উচ্চতৰ মাধ্যমিক বিদ্যালয়ৰ খেলপথাৰত আত্মসমৰ্পণ কৰে।
অনুষ্ঠানত বিদ্ৰোহী সকলে মুখ্য মন্ত্ৰী দেৱৰ ওচৰত অস্ত্ৰ-শস্ত্ৰ জমা দিয়ে।
বিদ্ৰোহী সকলে জমা দিয়া অস্ত্ৰ-শস্ত্ৰসমূহৰ ভিতৰত তিনিটা কাৰ্বাইনছ, এটা মৰ্টাৰ, এটা সাধাৰণ বন্দুক, ছয়টা ৭.৬২ এম এম এছ এল আৰলছ, চাৰিটা চাইনীজ ৰাইফল, এটা চিংগল বোৰগান, ১৯৩০৩ ৰাইফল, চাৰিটা এম ২০ পিষ্টল, নটা ৱাইৰলেছ চেট আৰু বৃহৎ পৰিমাণৰ আপত্তিজনক নথি-পত্ৰ।
বিদ্ৰোহী সংগঠনটোৰ সদস্যসকলে অস্ত্ৰ সম্বৰণ কৰাৰ পাছতে শুকুৰবাৰে কেন্দ্ৰ চৰকাৰে এন এল এফ টি(এছ ডি)ৰ সৈতে এখন বুজাবুজিৰ চুক্তি স্বাক্ষৰ কৰে।
প্ৰধান মন্ত্ৰী নৰেন্দ্ৰ মোদীৰ সবকা সাথ, সবকা বিকাশ, সবকা বিশ্বাস শ্লোগানৰ দ্বাৰা উদ্বুদ্ধ হৈ ত্ৰিপুৰাৰ কিছু সংখ্যক জনজাতীয় লোকে উগ্ৰপন্থা পৰিহাৰ কৰি মূল সুতিলৈ উভতি আহিছে বুলি অনুষ্ঠানত বিপ্লৱ কুমাৰ দেৱে মন্তব্য কৰে।
তেওঁ বিজেপি চৰকাৰে ত্ৰিপুৰাৰ জনজাতীয় লোকসকলৰ জীৱন ধাৰণৰ অৰ্থ-সামাজিক মান উন্নত কৰাৰ বাবে চেষ্টা কৰি আহিছে বুলিও মত প্ৰকাশ কৰে।
আনহাতে, ৰাজ্য চৰকাৰে জনজাতীয় অঞ্চলৰ পথ-যোগাযোগ ব্যৱস্থাৰ উন্নয়নৰ বাবে ১,৬০০ কোটি টকা আৱন্তন জনাইছে বুলিও অনুষ্ঠানত উল্লেখ কৰে মুখ্য মন্ত্ৰী দেৱে।
ত্ৰিপুৰাৰ পূৰ্বৰ চৰকাৰখনে জনজাতীয় লোকসকলৰ উন্নয়নৰ বাবে কোনোধৰণৰ কাম নকৰিলে বুলি দেৱে অভিযোগ কৰে।
উল্লেখযোগ্য যে, এন এল এফ টি ৰাজ্যখনত ২০০৫ চনৰ পৰা ২০১৫ চনলৈ সংঘটিত হোৱা ৩১৭ টা ঘটনাৰ সৈতে জড়িত হৈ আছিল য’ত ২৮ গৰাকী সুৰক্ষা বাহিনীৰ লোককে ধৰি ৬২ গৰাকী সাধাৰণ লোকে প্ৰাণ হেৰুৱাইছিল।
বিদ্ৰোহী সংগঠনটোৰ সৈতে ২০১৫ চনৰ পৰা শান্তি আলোচনাৰ প্ৰক্ৰিয়া আৰম্ভ হৈছিল আৰু ২০১৬ চনৰ পাছৰ পৰা ৰাজ্যখনত কোনোধৰণৰ হিংসাত্মক কাৰ্য্য সংঘটিত হোৱা নায়।
অনুষ্ঠানত মুখ্য মন্ত্ৰীৰ উপৰিও উপ-মুখ্য মন্ত্ৰী জিষ্ণু দেৱবৰ্মন আৰু সাংসদ ৰেৱতী ত্ৰিপুৰায়ো অংশগ্ৰহণ কৰে।