২ নৱেম্বৰ তথা দেওবাৰে আৰক্ষী আৰু সেনাবাহিনীয়ে গোপন সূত্ৰৰ আধাৰত অৰুণাচলৰ জয়ৰামপুৰত যুটীয়া অভিযান চলাই এক বৃহৎ সাফল্য লাভ কৰিবলৈ সক্ষম হয়।
এই অভিযানকালত আৰক্ষী-সেনা বাহিনীৰ দলটোৱে জয়ৰামপুৰ থানাৰ অন্তৰ্গত চামৰোৰ পৰা ৯ জনকৈ এন ডি এফ বি (ছাউৰাগ্ৰা)ৰ দুৰ্ধৰ্ষ কেডাৰ গ্ৰেপ্তাৰ কৰিবলৈ সক্ষম হয়। ধৃত সদস্যকেইজন ম্যানমাৰত প্ৰশিক্ষণপ্ৰাপ্ত এন ডি এফ বি(ছা)ৰ ৪২ নং গোটৰ সদস্য বুলি আৰক্ষীৰ সূত্ৰৰ পৰা জানিব পৰা গৈছে।
আটকাধীন এন ডি এফ বি(ছা)ৰ সদস্য কেইগৰাকী হ’ল ক্ৰমে ধৃত সুলেখা ব্ৰহ্ম, সুমুৰীয়া নাৰ্জাৰী, ৰাজেশ বসুমতাৰী, গাওদাং মুছাহাৰী, ৰীতা স্বৰ্গীয়াৰী, মণিৰাম বসুমতাৰী, ৰত্নজা নাৰ্জাৰী, বিনাৰাম নাৰ্জাৰী আৰু দিলীপ নাৰ্জাৰী।
উল্লেখযোগ্য যে ধৃত এন ডি এফ বি(ছা)ৰ দুৰ্ধৰ্ষ সদস্য কেইজনে ম্যানমাৰৰ পৰা অসমত প্ৰৱেশৰ চেষ্টা চলোৱাৰ সময়তে গোপন সূত্ৰৰ পৰা খবৰ লাভ কৰি জয়ৰামপুৰ আৰক্ষীৰ সহযোগত সেনা বাহিনীয়ে এম্বুচ কৰি দুৰ্ধৰ্ষ সদস্য কেইজনক গ্ৰেপ্তাৰ কৰিবলৈ সক্ষম হয়।
ধৃত সদস্যকেইজনৰ পৰা এ কে ৪৭, এ কে ৫৬, পিষ্টলসহ ৯ টা মাৰণাস্ত্ৰৰ লগতে বৃহৎ সংখ্যক সজীৱ গুলী উদ্ধাৰ কৰিবলৈ সক্ষম হয়।
