উত্তৰ প্ৰদেশৰ এক বস্তিত এগৰাকী বিজেপি সাংসদৰ বাহনৰ খুন্দাত শোকাৱহভাৱে প্ৰাণ হেৰুৱাইছে এটি শিশুৱে। বিজেপি সাংসদ হৰিশ দ্বিবেদীৰ দ্ৰুতবেগী বাহনে খুন্দা মৰাৰ ফলত ৯ বৰ্ষীয় শিশুটিৰ মৃত্যু হোৱা বুলি মঙলবাৰে আৰক্ষীয়ে প্ৰকাশ কৰে।
মৃত শিশুটিৰ পিতৃ শত্ৰুঘন ৰাজভৰে দাখিল কৰা এজাহাৰ অনুসৰি অভিষেক নামৰ তেওঁৰ ৯ বৰ্ষীয় সন্তান শনিবাৰে হাৰ্ডিয়া ছেক্সনৰ ওচৰত আন এটি শিশুৰ সৈতে বিদ্যালয়ৰ পৰা উভতি অহাৰ সময়তে এই দুৰ্ঘটনা সংঘটিত হৈছিল।
এজাহাৰৰ উদ্ধৃতি দি আৰক্ষীয়ে জানিবলৈ দিয়া মতে, শিশুকেইটিয়ে পথেৰে ঘৰ অভিমুখে গৈ থকাৰ সময়তে অভিষেকক দ্বীবেদীৰ এখন বগা ৰঙৰ এছ ইউ ভি বাহনে খুন্দা মাৰে।
গুৰুতৰভাৱে আহত শিশুটিক জিলা চিকিৎসালয়ত ভৰ্তি কৰোৱা হয় যদিও আঘাতৰ সমস্যা অত্যধিক হৈ পৰাৰ বাবে তাৰ পৰা লক্ষ্ণৌলৈ স্থানান্তৰ কৰা হয়। কিন্তু চিকিৎসালয়লৈ যোৱাৰ পথতে শিশুটিৰ মৃত্যু হয়।
ইফালে নিহত শিশুটিৰ পিতৃ ৰাজভৰে অভিযুক্ত বিজেপি সাংসদগৰাকীৰ বিৰুদ্ধে গুৰুতৰ অভিযোগ কৰিছে। এনে এক দায়িত্বশীল পদবীত থকাৰ পিছতো সাংসদগৰাকীয়ে শিশুটিক খুন্দিওৱাৰ পাছতো পথতে এৰি থৈ যায় বুলি উল্লেখ কৰিছে ৰাজভৰে।
সাংসদ দ্বিবেদীয়ে আঘাতপ্ৰাপ্ত শিশুটিক গাড়ীৰ পৰা নামি চিকিৎসালয়লৈ নিয়াৰ প্ৰয়োজনো অনুভৱ কৰা নাছিল বুলি ক্ষোভ উজাৰে শত্ৰুঘন ৰাজভৰে।
বিহাৰত কোনোবা সাংগঠনিক সভাত ব্যস্ত থকা সাংসদ দ্বিবেদীক এই দুৰ্ঘটনাৰ বিষয়ে তেওঁৰ কৰ্মচাৰীয়ে অৱগত কৰাৰ পাছতো দ্বিবেদী কোনো মন্তব্যৰ বাবে উপলব্ধ নহ’ল বুলিও জানিব পৰা গৈছে।
ইফালে ৰাজভৰৰ এই এজাহাৰৰ পাছতে চক্ৰ বিষয়া (বস্তি সদৰ) আলোক প্ৰসাদে সদৰী কৰা মতে, ভাৰতীয় দণ্ডবিধিৰ ২৭৯ আৰু ৩০৪এ ৰ অধীনত অচিনাক্ত ব্যক্তিৰ বিৰুদ্ধে এক গোচৰ ৰুজু কৰা হৈছে।
স্মৰ্তব্য যে কিছুদিন পূৰ্বে পশ্চিম বংগত এগৰাকী তৃণমূল কংগ্ৰেছৰ সাংসদৰ বাহনৰ খুন্দাত এটি শিশুৰ মৃত্যু হৈছিল।
অৱশ্যে খেলি থকাৰ পৰাই হঠাতে সাংসদগৰাকীৰ গাড়ীৰ সমুখলৈ আহি পৰাৰ বাবে এই দুৰ্ঘটনা সংঘটিত হোৱাৰ পাছত সাংসদগৰাকীয়ে নিজৰ বাহনেৰে আহত শিশুটিক চিকিৎসালয়লৈ নিয়াৰ লগতে সু-চিকিৎসাৰো ব্যৱস্থা কৰিছিল।
কিন্তু আঘাত গুৰুত হোৱাৰ বাবে চিকিৎসাধীন অৱস্থাত শিশুটিৰ মৃত্য হৈছিল। ইয়াৰ পাছতে সাংসদগৰাকীয়ে এই দুৰ্ঘটনাৰ বাবে শোক প্ৰকাশ কৰি নিহত শিশুটিৰ পৰিয়ালক যথাযথ ক্ষতিপূৰণ প্ৰদান কৰাৰ প্ৰতিশ্ৰুতি দিছিল।
