যোধপুৰ সাম্প্ৰদায়িক সংঘৰ্ষৰ গোচৰত ৯৭ জনক গ্ৰেপ্তাৰ: কেইবাটাও অঞ্চলত কাৰ্ফিউ জাৰি
ঈদৰ প্ৰাকমুহূৰ্তত ৰাজস্থানৰ যোধপুৰত সংঘটিত সাম্প্ৰদায়িক সংঘৰ্ষৰ গোচৰত ৰাজস্থান আৰক্ষীয়ে এতিয়ালৈকে ৯৭ জন লোকক গ্ৰেপ্তাৰ কৰিছে।
আনহাতে উদয় মন্দিৰ আৰু নাগোৰী গেটকে ধৰি যোধপুৰৰ কিছু অংশত কাৰফিউ অব্যাহত আছে। তদুপৰি উৰাবাতৰি বিয়পাৰ আশংকাত সমগ্ৰ অঞ্চলটোত ইণ্টাৰনেট সেৱা স্থগিত ৰখা হৈছে।
উল্লেখ্য যে যোধপুৰৰ জালোৰী চকৰ ওচৰত ঈদৰ লগত সংগতি ৰাখি এখন বেনাৰ লগোৱাৰ লগতে এটা লাউডস্পীকাৰ স্থাপন কৰা হৈছিল।
ইয়াকে কেন্দ্ৰ কৰি অঞ্চলটোত সোমবাৰে নিশা ইছলাম ধৰ্মাৱলম্বী সকলৰ সৈতে একাংশ হিন্দু লোকৰ বিবাদৰ সূত্ৰপাত হয়।
যোধপুৰত চলি থকা তিনিদিনীয়া পৰশুৰাম জয়ন্তী উৎসৱৰ সময়তে এই ঘটনা সংঘটিত হৈছিল।
ইফালে ৰাজ্যখনৰ মুখ্যমন্ত্ৰী অশোক গেহলটে এই হিংসাত বিজেপিৰ ষড়যন্ত্ৰৰ অভিযোগ উত্থাপন কৰিছে।
সংবাদ মাধ্যমৰ আগত তেওঁ কয়, “এইয়া বিজেপিৰ ষড়যন্ত্ৰ। দেশত মুদ্ৰাস্ফীতি, নিবনুৱা সমস্যা বৃদ্ধি পাই আহিছে। বিজেপিয়ে এইয়া নিয়ন্ত্ৰণ কৰিব নোৱাৰে।”
সেয়েহে, এনে বিষয় সমূহৰ পৰা জনতাৰ মনোযোগ আঁতৰাবলৈ বিজেপিয়ে ইচ্ছাকৃতভাৱে এনে ষড়যন্ত্ৰ কৰিছে বুলি অভিযোগ কৰে মুখ্যমন্ত্ৰী গেহলটে।