কা বিৰোধী জাতীয় সংগঠনৰ নেতাক সোধপোচৰ বাবে তলব আৰক্ষীৰ অপৰাধ শাখাৰ

কা বিৰোধী জাতীয় সংগঠনৰ নেতাক সোধপোচৰ বাবে আজি তলব কৰে অসম আৰক্ষীৰ অপৰাধ শাখাই।

পানবজাৰস্থিত আৰক্ষীৰ অপৰাধ শাখাত আজিৰ দিনটোত সোধ-পোচৰ বাবে মাতে কৃষক মুক্তি সংগ্ৰাম সমিতিকে ধৰি অন্যান্য সংগঠনৰ প্ৰায় ১০ গৰাকী নেতাক।

অসম আৰক্ষীৰ অপৰাধ অনুসন্ধান শাখাই নিজাববীয়াকৈ ৰুজু কৰা Crime Branch PS Case No 01/2019,U/S 120(B)/122/123/143/147/148/149/150/152/153/326/333/353IPCত গোচৰত আজি পৃথক পৃথককৈ জেৰাৰ সন্মুখীন হয় অনুসূচিত জাতি যুৱ পৰিষদৰ সভাপতি ৰুবুল দাস, স্বৰাজ অসমৰ আহ্বায়ক ভবেন সন্দিকৈ, কৃষক মুক্তি সংগ্ৰাম সমিতিৰ সভাপতি  ভাস্ক’ডি শইকীয়া, কৃষক মুক্তিৰ উপদেষ্টা সুব্ৰত চক্ৰৱৰ্তী, ছাত্ৰ মুক্তিৰ মহানগৰ সমিতিৰ সভাপতি আশ্বিক আলি, পুথি প্ৰকাশক সংস্থাৰ ৰক্তিম ঠাকুৰীয়া, আই আই টি গুৱাহাটীৰ গবেষক ছাত্ৰ হিমালয় বৰাসহ কৃষক মুক্তিৰ মহানগৰ সমিতিৰ বহুকেইজন বিষয়ববীয়া।

অপৰাধ শাখাৰ সহকাৰী আৰক্ষী আয়ুক্ত পুতুল বৈশ্যৰ নেতৃত্বত কেইবাগৰাকী আৰক্ষী বিষয়াই একেলগে জেৰা চলায় নেতাকেইগৰাকীক।

আৰক্ষীৰ জেৰাৰ সন্মুখীন হৈ আহি সংবাদ মাধ্যমৰ আগত অনুসূচিত জাতি যুৱ পৰিষদৰ সভাপতি  ৰুবুল দাসে কয় ‘যোৱা ১১ আৰু ১২ ডিচেম্বৰত গুৱাহাটীত যিবোৰ ঘটনা সংঘটিত হৈছিল সেই সন্দৰ্ভত আমাক সোধা-পোচা কৰিবৰ বাবে আজি আমাক মাতি অনা হৈছে। যিমান দূৰলৈকে আমি সহযোগিতা আগবঢ়াব পাৰো আমি আগবঢ়াইছো।’

বিগত সময়ছোৱাত কৃষক নেতা অখিল গগৈৰ লগতে কৃষক মুক্তি সংগ্ৰাম সমিতিৰ অন্যান্য নেতা-কৰ্মীৰ সৈতে যিমানবোৰ টেলিফোনিক বাৰ্তালাপ হৈছিল বা সভা সমিতি অনুষ্ঠিত হৈছিল সেই আটাইবোৰ সন্দৰ্ভত আৰক্ষী অপৰাধ শাখাই সোধা-পোচা কৰা দাসে জানিবলৈ দিয়ে।

‘২০১৫ চনৰ পৰা কৃষক মুক্তি সংগ্ৰাম সমিতিৰ লগত বহুবোৰ প্ৰতিবাদী কাৰ্য্যসূচী কৰা হৈছিল। অসম লোকসেৱা আয়োগৰ বিৰুদ্ধে আন্দোলন কৰি গ্ৰেপ্তাৰ হৈ অখিল গগৈ আৰু কমল মেধিৰ লগত জেইলত থকা সময়ছোৱাৰ সময়ৰ কথা সোধা পোচা কৰিছিল। আন্দোলনৰ পুঁজি ক’ৰ পৰা সংগ্ৰহ হৈছিল বা আন্দোলনৰ সৈতে মাওবাদী বা সশস্ত্ৰ সংগঠনৰ কোনো নেতা জড়িত হৈ আছে নেকি সেই সম্পৰ্কেও অপৰাধ শাখাই সোধা-পোচা কৰে।’ সংবাদ মাধ্যমৰ আগত এইদৰে কয় দাসে।

সৰ্বানন্দ সোণোৱালৰ গৃহ বিভাগৰ এইসকল আৰক্ষী বিষয়া কা বিৰোধী আন্দোলনক লৈ যথেষ্ট শংকিত বুলি মন্তব্য কৰি দাসে কয় ‘অখিল গগৈয়ে জেইলৰ পৰা জনোৱা নতুনকৈ গঠিত হ’বলগীয়া ৰাজনৈতিক শক্তি নিঃশেষ কৰিবৰ বাবে তেওঁলোক উঠি-পৰি লাগিছে বুলি অনুভৱ হৈছে। লক্ষণীয় ভাৱে কা বিৰোধী সংগঠনৰ পৰা বাছি বাছি কিছুসংখ্যক সংগঠনৰ নেতা কৰ্মীক তলব কৰিছে।’

‘অসম আৰক্ষী সৰ্বানন্দ সোণোৱাল নেতৃত্বাধীন বিজেপি চৰকাৰ আৰু আৰ এছ এছৰ পোহনীয়া গুণ্ডালৈ ৰূপান্তৰিত হৈছে।’ তেওঁ লগতে কয়।

তাৎপৰ্যপূৰ্ণভাৱে আৰক্ষীক অৱগত নকৰাকৈ গুৱাহাটী মহানগৰ এৰি নাযাবলৈ তলব কৰা জাতীয় দল সংগঠনৰ নেতৃত্বক নিৰ্দেশ দিছে বুলি দাসে জানিবলৈ দি লগতে কয় ‘মানসিক নিৰ্যাতন চলোৱা হৈছে বুলি ক’ব পাৰি। টেলিফোনৰ কল ৰেকৰ্ড দেখুৱাই আৰক্ষীয়ে আমাক ভয় ভাবুকি দেখুৱাব বিচাৰিছে। আমাক আন্দোলন কৰিব নালাগে, সংগঠন কৰিব নালাগে বুলি তেওঁলোকে ক’ব বিচাৰিছে।’

ইপিনে, কৃষক নেতা অখিল গগৈৰ সৈতে স্বৰাজ অসমৰ আহ্বায়ক ভবেন সন্দিকৈৰ কিমান দিনৰ চিনাকি বা সম্পৰ্ক আছে সেই কথা আৰক্ষীয়ে তেওঁক সোধা বুলি সন্দিকৈয়ে উল্লেখ কৰে।

‘কা বিৰোধী আন্দোলনৰ সময়ত কেনেকৈ সম্পৰ্ক হ’ল? অখিল গগৈৰ লগত কিমান দিনৰ সম্পৰ্ক? ইত্যাদি প্ৰশ্নবোৰ সোধা হৈছিল আৰু আমি জনাই দিছো যে অখিল গগৈৰ সৈতে কটন কলেজত পঢ়াৰে পৰা সম্পৰ্ক আছিল। সেই কাৰণতে তেওঁলোকৰ লগত ফোনত কথা-বতৰা হয় বুলি তেওঁলোকক জনাইছো।’ আৰক্ষীৰ অপৰাধ শাখাৰ জেৰাৰ সন্মুখীন হৈ আহি ভবেন সন্দিকৈয়ে সাংবাদিকৰ আগত এইদৰে কয়।

জানিব পৰা মতে এই গোচৰত ৪০ জনতকৈ অধিক কা বিৰোধী নেতাক তলব কৰিব আৰক্ষীৰ অপৰাধ শাখাই।