আন্তৰ্জাতিক নাৰী দিৱসৰ লগত সংগতি ৰাখি যুৱ সাংবাদিক মঞ্চই আজি মহানগৰীৰ সিজুবাৰীস্থিত মাদাৰ অল্ড এজ হ’মত আয়োজন কৰে এক বিশেষ অনুষ্ঠান।
কেক কাটি পালন কৰা হয় নাৰী দিৱসৰ লগতে যুৱ সাংবাদিক মঞ্চৰ পঞ্চম সংখ্যক প্ৰতিষ্ঠা দিৱস।
এই অনুষ্ঠানত যুৱ সাংবাদিক মঞ্চৰ সভাপতি নিপা কাকতি, যুটীয়া সাধাৰণ সম্পাদক দিব্যজ্যেতি দাসৰ লগতে আন বহুতো সদস্য উপস্থিত থাকে।
সংগঠনটোৰ প্ৰতিষ্ঠা দিৱসৰ কেক কাটি বৃদ্ধাৱাসৰ ১০৫ বছৰীয়া আইতা শুভদ্ৰা দেৱীয়ে কয়, ‘আজি ভাল লাগিছে অনুষ্ঠানসমূহ আগলৈও যেন নতুন প্ৰজন্মই এই সমূহ ভাল কাম কৰক তাৰ বাবে যুৱ সাংবাদিক সকলে নতুন প্ৰজন্মক আগ্ৰহী কৰিবলৈ চেষ্টা কৰিব ৷ নাৰী দিৱস আমিও কৰিছো এতিয়াহে বুঢ়া হ’লো’৷
আইতা গৰাকীয়ে লগতে অতি দুখেৰে কয়, ‘যি যাতনা পাব লাগে পাই আহিলো গোটেই খিনি ৷ সুখ-দুখ সকলো। নাৰী সকলক অৱহেলা নকৰিবলৈ আহ্বান আইতা গৰাকীৰ। নাৰী-পুৰুষেহে সংসাৰ। অকল পুৰুষেও সংসাৰ কৰিব নোৱাৰে নাৰীয়েও অকলে সংসাৰ কৰিব নোৱাৰে। নাৰী-পুৰুষৰ মিল লাগিব তেতিয়াহে এখন সুস্থ সমাজ সৃষ্টি হ’ব’।
ইফালে যুৱ সাংবাদিক মঞ্চৰ মহিলা সাংবাদিক সকলক বৃদ্ধাৱাস কৰ্তৃপক্ষই নাৰী দিৱস উপলক্ষে সম্বৰ্ধনা জ্ঞাপন কৰে। আইতা সকলৰ নাম প্ৰসংগৰে মুখৰিত হৈ পৰে অনুষ্ঠানৰ বাকৰি।
যুৱ সাংবাদিক মঞ্চৰ লগতে ‘Mosfica womens welfare society’ৰ উদ্যেগতো নাৰী দিৱস উদযাপন কৰা হয় ৷ সংগঠনটোৱে বৃদ্ধাশ্ৰমৰ আবাসী সকলক চাদৰ, কেক আদি বিতৰণ কৰে।
