চুবুৰীয়া দুখন ৰাজ্য মণিপুৰ আৰু মিজোৰামত নভেল কৰ’নাভাইৰাছৰ দুটা পজিটিভ ঘটনা পোহৰলৈ অহাৰ পাছত অসমত এতিয়া অতি সতৰ্কতা অৱলম্বন কৰা হৈছে।
অসম চৰকাৰে গোটেই ৰাজ্যখনতে উপযুক্ত প্ৰতিৰোধ ব্যৱস্থা গ্ৰহণ কৰিবলৈ তথা কঠোৰ নিৰীক্ষণ ৰাখিবলৈ জিলা প্ৰশাসনক নিৰ্দেশ দিছে।
ৰাজ্যখনত ২১ দিনৰ বাবে ৰাষ্ট্ৰীয় লকডাউনৰ বাবে প্ৰস্তুতি চলাইছে যদিও দৈনিক হাজিৰা কৰা লোক, বিশেষকৈ চাহ বাগিচাৰ নিয়োজিত শ্ৰমিকসকললৈ কোনো ধৰণৰ আৰ্থিক সাহায্যৰ কথা ঘোষণা কৰা নাই।
ৰাজ্যখনৰ শ্ৰম মন্ত্ৰী সঞ্জয় কিষানে জানিবলৈ দিছে যে ৰাজ্য চৰকাৰে দৈনিক মজুৰি কৰা শ্ৰমিকসকলক কেনেদৰে সহায় কৰিব পৰা যায় সেই বিষয়ে চিন্তা চৰ্চা কৰি আছে আৰু শীঘ্ৰেই এক সিদ্ধান্ত গ্ৰহণ কৰিব।
মন্ত্ৰী গৰাকীয়ে লগতে জানিবলৈ দিয়া মতে শ্ৰম বিভাগে জিলা প্ৰশাসন, সামাজিক সংগঠন আৰু ট্ৰেড য়ুনিয়নৰ সৈতে যৌথভাৱে দৈনিক মজুৰ তথা চাহ শ্ৰমিকসকলক সহায় কৰাৰ বাবে কাম আৰম্ভ কৰিছে।
চৰকাৰে চাহ বাগিচাৰ লোকসকলৰ মাজত সজাগতা সৃষ্টিৰ বাবেও ব্যৱস্থা গ্ৰহণ কৰিছে। তদুপৰি, ৰাজ্যখনৰ বাহিৰৰ পৰা অহা লোকসকলক হোম কোৱাৰানটাইনলৈ প্ৰেৰণ কৰা হৈছে।
ৰাজ্যখনত মুঠতে ৮০৩খন পঞ্জীকৃত চাহ বাগিচা আৰু দহ হাজাৰতকৈয়ো অধিক ক্ষুদ্ৰ চাহ বাগিচা আছে। চাহ উদ্যোগটোত প্ৰায় ৪৫ লাখ দৈনিক মজুৰি কৰা শ্ৰমিকে কাম কৰি আছে।
আনহাতে, চাহ বাগিচাৰ এক বৃহৎ সংখ্যক শ্ৰমিক এতিয়াও নভেল কৰ’নাভাইৰাছ সম্পৰ্কে সজাগ নহয়। তেওঁলোকক মাস্ক, হেণ্ড ছেনিটাইজাৰৰ দৰে প্ৰতিৰোধমূলক কোনো সামগ্ৰীও আগবঢ়োৱা হোৱা নাই।
বহু শ্ৰমিকে ভাইৰাছবিধ অহা বুলি শুনিছে যদিও কৰ’নাভাইৰাছ কি সেই বিষয়ে জ্ঞাত নহয়। বাগিচা কৰ্তৃপক্ষইয়ো তেওঁলোকক মাস্ক বা চাবোন আদি আগবঢ়োৱা নাই।
উল্লেখ্য যে অসমত এতিয়াও Covid-19 পজিটিভৰ কোনো ঘটনা পোহৰলৈ অহা নাই।
