ক’ৰ’না ভাইৰাছৰ বিৰুদ্ধে যুঁজিবলৈ ভাৰতৰ কেইবাগৰাকীও ক্ৰিকেটাৰ আগবাঢ়ি আহিছে। এইবাৰ মহামাৰী ভাইৰাছবিধৰ বিৰুদ্ধে যুঁজিবলৈ ভাৰতীয় ক্ৰিকেট দলৰ অধিনায়ক বিৰাট কোহলি আৰু তেওঁৰ পত্নী অনুষ্কা শৰ্মাই আৰ্থিক অনুদান আগবঢ়োৱাৰ কথা ঘোষণা কৰিছে।
ক’ৰ’না ভাইৰাছৰ ফলত বিশ্বত এই পৰ্যন্ত ৩৪,০০০ ৰো অধিক লোকে মৃত্যুবৰণ কৰিছে। আৰু ভাৰতত এই ভাইৰাছবিধে এতিয়ালৈকে ৩১ লোকৰ প্ৰাণ কাঢ়ি নিছে।
সোমবাৰে ভাৰতীয় ক্ৰিকেট দলৰ অধিনায়ক কোহলিয়ে টুইটাৰৰ জৰিয়তে ঘোষণা কৰি কয়, ‘অনুষ্কা আৰু মই পি এম কেয়াৰ্ছ ফাণ্ড আৰু মহাৰাষ্ট্ৰৰ মুখ্য মন্ত্ৰীৰ সাহায্য পুঁজিলৈ সহায় আগবঢ়োৱাৰ সিদ্ধান্ত লৈছো’।
কোহলিয়ে লগতে কয় যে বহু লোকক এই ভাইৰাছৰ বিৰুদ্ধে সংঘৰ্ষ কৰি থকা দেথি আমাৰ দুখ লাগিছে আৰু আমি আশা কৰিছো যে আমাৰ সামান্য অনুদানে এই লোক সকলৰ দুখ কম কৰাত সহায় কৰিব।
Anushka and I are pledging our support towards PM-CARES Fund & the Chief Minister’s Relief Fund (Maharashtra). Our hearts are breaking looking at the suffering of so many & we hope our contribution, in some way, helps easing the pain of our fellow citizens #IndiaFightsCorona
— Virat Kohli (@imVkohli) March 30, 2020
অৱশ্যে বিৰাট কোহলিয়ে প্ৰধান মন্ত্ৰী আৰু মহাৰাষ্ট্ৰৰ মুখ্য মন্ত্ৰীৰ সাহায্য পুঁজিলৈ কিমান পৰিমানৰ বৰঙণি আগবঢ়াই সেয়া গোপনে ৰাখিছে।
উল্লেখ্য যে বিৰাট কোহলিৰ পূৰ্বে ক্ৰিকেটাৰ সুৰেশ ৰাইনাই ৫২ লাখ টকা আগবঢ়াইছিল।
ইয়াৰ উপৰি শচিন টেণ্ডুলকাৰে ৫০ লাখ, বেডমিণ্টন খেলুৱৈ পি ভি সিন্ধুই ১০ লাখ, আজিংক্যা ৰাহানেই মহাৰাষ্ট্ৰৰ মুখ্য মন্ত্ৰীৰ সাহায্য পুঁজিলৈ ১০ লাখ, বি চি চি আইৰ অধ্যক্ষ সৌৰভ গাংগুলীয়ে ৫০ লাখ টকাৰ চাউল, ক্ৰিকেটাৰ ঈষাণ কিষাণে ২০ লাখ, অতুল ৱাছানে ৫ লাখ, আৰু সৌৰভ তিৱাৰিয়ে ১.৫০ লাখ টকা আগবঢ়াইছে।
