COVID-19ত আক্ৰান্ত লোকসকলক বিচাৰি উলিয়াবলৈ অসম আৰক্ষীয়ে নতুন প্ৰযুক্তি ব্যৱহাৰ কৰিছে। আৰক্ষী সঞ্চালক প্ৰধান ভাস্কৰজ্যোতি মহন্তই এই কথা সদৰী কৰে।
শনিবাৰে মঙলদৈৰ আৰক্ষী ছাউনিত উপস্থিত হৈ তেওঁ সাংবাদিকৰ আগত এইদৰে কয়। অতিৰিক্ত আৰক্ষী সঞ্চালক প্ৰধান (এছ টি এফ)ৰ তত্তাৱধানত এটা বিশেষ দলে স্বাস্থ্য বিভাগৰ সৈতে যোগাযোগ ৰক্ষা কৰি কাম কৰি আছে বুলি তেওঁ লগতে কয়।
শনিবাৰে মহন্তই বৰ্তমান পৰিস্থিতিৰ সম্পৰ্কে আলোচনা কৰিবলৈ দৰং আৰু ওদালগুৰিৰ আৰক্ষী বিষয়াসকলৰ সৈতে এক বৈঠকত বহে।
আনহাতে নিজামুদ্দিনৰ ঘটনাৰ পিছত ৰাজ্যত ক’ৰ’না ভাইৰাছৰ সক্ৰমণ বৃদ্ধি পোৱা সম্পৰ্কত সাংবাদিকৰ প্ৰশ্নৰ উত্তৰত তেওঁ কয়, ’আমি বিষয়টো গুৰুত্বসহকাৰে লৈছো আৰু নলবাৰীৰ দৰে আন ঠাইটো বাহিৰৰ পৰা অহা লোকসকলক বিচাৰি উলিয়াবলৈ চেষ্টা চলাই আছো।‘
ছ’চিয়েল মিডিয়াত উৰা-বাতৰি বিয়পাই থকাসকলক সতৰ্ক কৰি তেওঁ কয়, ‘একাংশ সমাজ-বিৰোধী চক্ৰই ধৰ্ম, সম্প্ৰদায় বা কোনো ব্যক্তি বিশেষৰ বিৰুদ্ধে ছ’চিয়েল মিডিয়াত অপপ্ৰচাৰ চলাই আছে। অসম আৰক্ষীয়ে এই দুৰ্যোগৰ সময়ত এনে কাম সহ্য নকৰে।‘
‘এই লোকসকলক বিচাৰি উলিওৱা হ’ব আৰু তেওঁলোকৰ ওপৰত কঠোৰ ব্যৱস্থা গ্ৰহণ কৰা হ’ব।‘ তেওঁ লগতে কয়।
ইয়াৰ উপৰি ৰাইজকো তেওঁ ল’কডাউন মানি চলিবলৈ আহ্বান জনাই নিয়ম ভংগ কৰাসকলক শাস্তি বিহা হ’ব বুলি মন্তব্য কৰে।
