আৰক্ষীৰ মূৰত এটা বিশেষ হেলমেট। ল’কডাউন ভংগকাৰীক বিশেষ হেলমেট পৰিহিত আৰক্ষীগৰাকীয়ে ক’ৰ’না ভাইৰাছৰ ভয়াৱহতা সম্বন্ধে বুজাই ঘৰতে থাকি নিজৰ, পৰিয়ালৰ লগতে দেশক ৰক্ষা কৰিবলৈ বুজাইছে।
দেশৰ অন্যান্য প্ৰান্তত আৰক্ষীয়ে ল’কডাউন অমান্যকাৰী বেত্ৰাঘাট কৰিছে। অথচ বিশেষ হেলমেট পৰিধান কৰাৰ আৰক্ষীয়ে বেত্ৰাঘাট কৰাৰ বিপৰীতে ল’কডাউন অমান্যকাৰীক ধুনীয়াকৈ বুজাই বঢ়াই ঘৰলৈ পঠিয়াই দিছে।
চ’ছিয়েল মিডিয়াত ব্যাপকৰূপত ভাইঅৰাল হৈ পৰা এই দৃশ্য আপুনিও নিশ্চয় দেখিছে।
এই ভাইৰেল হৈ পৰা ভিডিঅ’ত আকৰ্ষণৰ কেন্দ্ৰবিন্দু হৈছে আৰক্ষীয়ে মূৰত পৰিধান কৰা এটা বিশেষ হেলমেট। এই বিশেষ হেলমেটটো হৈছে সমগ্ৰ বিশ্বত নৰ সংহাৰ চলোৱা ক’ৰ’না ভাইৰাছৰ আকৃতিৰ হেলমেট।
প্ৰধানমন্ত্ৰী নৰেন্দ্ৰ মোদীয়ে দেশত ২১ দিনীয়া ল’কডাউন ঘোষণা কৰাৰ চাৰি দিনৰ পিছতে চ’ছিয়েল মিডিয়াত ভাইৰেল হৈ পৰা এই হেলমেটটো পৰিধান কৰিছিল চেন্নাইৰ আৰক্ষীৰ ৰাজেশ বাবুৱে।
Indian police inspector Rajesh Babu wearing a #coronavirus-themed helmet stands near a checkpoint during a government-imposed nationwide lockdown as a preventive measure against the COVID-19 coronavirus in Chennai on March 28, 2020.
Photos by AFP pic.twitter.com/LO8l8lnNW0
— Press TV (@PressTV) March 28, 2020
দেশত ব্যাপক চৰ্চা লাভ কৰা এই বিশেষ হেলমেটটো সৃষ্টি কৰিছে বি গৌথম নামৰ এজন শিল্পীয়ে।
ক’ৰ’না ভাইৰাছৰ থিমেৰে সৃষ্টি কৰা হেলমেটো এটা ভলী বলত পাতল কাঠৰ তৰপ লগাই বাতিৰ কাকতেৰে বিশেষভাৱে ক্ৰাফ্ট কৰি সৃষ্টি কৰা হৈছে।
জনসাধাৰণক ক’ৰ’না ভাইৰাছৰ ভয়াৱহতা সম্পৰ্কে সজাগ কৰি তুলি মানুহক নিজক আৰু পৰিয়ালৰ লগতে দেশখনকো সুৰক্ষিত কৰিবলৈ এটা বাৰ্তা প্ৰেৰণ কৰিবলৈকে ২৭ বছৰীয়া শিল্পী গৌথমে এই বিশেষ হেলমেটটো সৃষ্টি কৰা বুলি জানিবলৈ দিছে।
গৌথমৰ সৃষ্টি কৰা এই বিশেষ হেলমেটোৱে সমগ্ৰ দেশতে ব্যাপক চৰ্চা লাভ কৰা দেখা গৈছে।
বিভিন্নজনে তেওঁৰ সৃষ্টিক চ’ছিয়েল মিডিয়াৰ জৰিয়তে প্ৰশংসা কৰাও পৰিলক্ষিত হৈছে।
উল্লেখ্য চেন্নাইৰ ভিল্লিভাক্কম ভি১ আৰক্ষী থানাৰ ৰাজেশ বাবুৱে এই হেলমেটো পৰিধান কৰি ডিউটী কৰি থকাৰ ভিডিঅ’ প’ষ্ট কৰাৰ লগে লগে ই সমগ্ৰ দেশতে ভাইৰেল হৈ পৰাৰ লগতে ব্যাপক চৰ্চা লাভ কৰা দেখা যায়।
