মহামাৰী ক’ৰ’না ভাইৰাছৰ বাবে সমগ্ৰ দেশজুৰি ঘোষণা কৰা হৈছে ল’কডাউন। ঘৰতে আবদ্ধ হৈ থাকিব লগীয়া হোৱাৰ বাবে চহৰাঞ্চলৰ সমান্তৰালভাৱে নগাঁৱৰ চাপানালাৰ গ্ৰামাঞ্চল সমূহতো পূৰ্ণ প্ৰভাৱ পৰিছে ল’কডাউনৰ।
এইখিনি সময়ত একাংশ অতি দৰিদ্ৰ লোকে এমুঠি অন্নৰ বাবে হাহাকাৰ কৰিবলগীয়া হৈছে।
তেনে সময়তে ৰেচন কাৰ্ডৰ জৰিয়তে চৰকাৰী চাউল পোৱা হিতাধিকাৰীৰ লগতে যি সকলে নিজৰ খেতিৰ পৰা বছৰৰ বাবে কিছু পৰিমাণো হলেও লাভান্বিত হয় সেইসকলে লুংচুং চাহ বাগিছা যুৱ মঞ্চৰ সহযোগত সংকটৰ সময়ত আৰ্তজনক এমুঠি অন্ন প্ৰদান কৰি দেখুৱাইছে এক উৎকৃষ্ট নিৰ্দশন।
লুংচুং চাহ বাগিছা যুৱ মঞ্চ আৰু ৰেচন কাৰ্ড হিতাধিকাৰী তথা খেতিয়কসকলে লোৱা আদৰণীয় পদক্ষেপে সকাহ প্ৰদান কৰিছে নগাঁও-কাৰ্বি আংলং সীমান্তৱৰ্ত্তী দৰিদ্ৰ ৰাইজক।
সাহায্য বিতৰণৰ সময়ত সামাজিক দূৰত্ব বজাই ৰাখি এক মিটাৰ দূৰে দূৰে সকলোকে শৃংখলাবদ্ধ ভাৱে শাৰী পতাই বিতৰণ কৰিছে খাদ্য সামগ্ৰী। লগতে সাহাৰ্য্য বিতৰণৰ আগত হাত ধুৱাৰো ব্যৱস্থা ৰাখি সকলোকে সচেতন কৰাৰো প্ৰয়াস কৰা দেখা গৈছে।
ইফালে একে উদ্দেশ্যেৰে চামগুৰিৰ লাওখোৱাৰ দৰিদ্ৰ ৰাইজৰ মাজলৈ আগবাঢ়ি আহিছে আমবাগান আৰক্ষী চকীৰ ভাৰপ্ৰাপ্ত আৰক্ষী বিষয়া গুৰুপ্ৰসাদ তালুকদাৰৰ নেতৃত্বত আমবাগান আৰক্ষী চকীৰ এটা দল।
আৰক্ষীৰ দলটোৱে আমবাগান আৰক্ষী চকীৰ এলেকাধীন মুঠ ২৬টা গাঁৱৰ শতাধিক দৰিদ্ৰ পৰিয়ালৰ মাজত খাদ্য সামগ্ৰী বিতৰণ কৰা দেখা যায়। লগতে আৰক্ষীৰ দলটোৱে তেওঁলোকৰ নিজ দৰমহাৰ পৰা এটা অংশ প্ৰধানমন্ত্ৰী আৰু মূখ্যমন্ত্ৰীৰ সাহায্য পুঁজিলৈ প্ৰেৰণ কৰৰো সিদ্ধান্ত লোৱা বুলি জানিবলৈ দিয়ে।
আমবাগান আৰক্ষী চকীৰ ভাৰপ্ৰাপ্ত বিষয়া গুৰুপ্ৰসাদ তালুকদাৰৰ নেতৃত্বত আৰক্ষী দলটোৰ এই প্ৰশংসনীয় পদক্ষেপক লৈ ৰাইজৰ মাজত ব্যাপক সকাহ পৰিলক্ষিত হৈছে।
